Президент: Барлық түйткіл бейбіт және дипломатиялық жолмен шешілуге тиіс
Мемлекет басшысы Қасым-Жомарт Тоқаев Франция президенті Эмманюэль Макронмен Ақордадағы кездесуінен кейінгі бірлескен мәлімдемеде әлемдегі түрлі саяси шиеленістер мен экономикалық дағдарыстар елді алаңдатып отырғанын атап өтті, деп хабарлайды Kazinform агенттігі.
«Сондай-ақ, біз аймақтық және жаһандық күн тәртібіндегі өзекті мәселелер жөнінде пікір алмастық. Әлемдегі түрлі саяси шиеленістер, экономикалық дағдарыстар елімізді алаңдатып отыр. Әрине, барлық түйткіл бейбіт және дипломатиялық жолмен шешілуге тиіс. Құрметті журналистер, жалпы бүгінгі келіссөз өзара сенім және түсіністік жағдайында өтті. Осының нәтижесінде Қазақстан мен Францияның қарым-қатынасы жаңа деңгейге көтеріледі деп сенемін. Ең бастысы, қазіргі стратегиялық бағытымыз — екі ел халқының да кең қолдауына ие болғаны ерекше қуантады», — деді Қасым-Жомарт Тоқаев.
Мемлекет басшысы биыл екі ел арасындағы стратегиялық әріптестік туралы келісімге қол қойылғанына 15 жыл толғанына тоқталды.
«Достық пен өзара қолдауға негізделген осы ынтымақтастықты одан әрі нығайту — ортақ міндетіміз. Бірге күш жұмылдырып, көздеген мақсатқа жетеміз. Мен оған кәміл сенемін. Біз құрметті президент Эмманюэль Макронмен мазмұнды келіссөз жүргіздік. Екі ел арасындағы ықпалдастықтың аясын кеңейтуге мол мүмкіндік бар. Франция — Қазақстанның ең ірі сауда серіктесінің бірі. Биылғы 8 ай ішінде сауда-саттық көлемі өткен жылмен салыстырғанда 21 пайызға өсті. Яғни, 2,7 млрд долларға жетті. Сондай-ақ, Франция негізгі шетелдік инвесторларымыздың қатарына кіреді. Соңғы 15 жылда Франциядан Қазақстанға 18,7 млрд долларға жуық инвестиция тартылды. Елімізде 170-тен астам француз компаниясының табысты жұмыс істеуі — соның айқын дәлелі», — деді Президент.
Еске салайық, Франция Президенті Эмманюэль Макрон ресми сапармен Қазақстанға келді.
Қасым-Жомарт Тоқаев Ақордада Франция Президенті Эмманюэль Макронды қарсы алды.
Қазақстан мен Франция президенттері шағын құрамда келіссөз жүргізді.
Макрон бұл сапар екіжақты серіктестік үшін маңызды жылмен тұспа-тұс келіп отырғанын айтты.
Қазақстан Президенті өз сөзінде Франция – Қазақстанның Еуропадағы өте маңызды серіктесі екенін атап өтті.
Сондай-ақ, Президент кездесу кезінде білім және ғылым саласындағы жобаларды қолға алуға ерекше көңіл бөлінгенін жеткізді.
Эмманюэль Макрон қазақ мектептеріне француз тілін оқыту тәжірибесі қайта оралғаны маңызды екенін жеткізді.
Мемлекет басшыларының кездесуінен кейінгі қос елдің қарым-қатынасы қай бағытта дамуы мүмкін?
Айта кету керек, Қазақстан Президенті Қасым-Жомарт Тоқаевтың Францияға былтыр жасаған ресми сапары аясында 35 құжатқа қол қойылған болатын.
