Президент Телерадиокешені соғыс ардагері Жақан Сейсебаевты ғасыр жасымен құттықтады
АЛМАТЫ. KAZINFORM — 10 наурызда соғыс ардагері Жақан Сейсембаев өзінің 100 жылдық мерейтойын атап өтеді.
Жыл санап қатары сиреп бара жатқан соғыс ардагерлері — тілі бар тірі тарихтың нағыз өзі. Солардың бірі — алматылық Жақан Сейсебаев. Ақсақал 10 наурыз күні 100 жасқа толады. Екінші дүниежүзі соғысының ардагеріне туған күні қарсаңында Президент телерадиокешенінің ұжымы құрмет көрсетті.
Kazinform агенттігі басқарушы директорының орынбасары — қазақ редакциясының бас редакторы Нағашыбек Алдан қарт жауынгерге шапан жауып, тәтті толтырылған себет және шипажайға жолдама табыстады.
Өз кезегінде ардагер батасын беріп, соғыс жылдарындағы естеліктерімен бөлісті.
Жақан Сейсебаев Беларусьті азат ету шайқасына қатысып, үш жерден жарақат алған. Жеңіс күнін Кенигсбергте қарсы алды. Одан кейін совет-жапон соғысына қатысып, елге 1948 жылы оралады.
— 17 жасымда соғысқа аттандым. Сұрапыл соғыста бастан көп оқиға өтті. 1942 жылы бізді армия қатарына алды. Төрт ай бойы әскери техниканы басқаруды үйретті, ол кезде әртүрлі артиллериялық құрылғылар болды. 1943 жылы 1 қаңтарда беларусьтік фронтқа түстім. Біз реактивті артиллерияның БМ-13 «Катюша» машинасын қолдандық. 1943 жылы 12 наурызда оң жақ желкем мен басымнан жарақат алдым. Осы оқиғадан кейін мені Мәскеуге госпитальге алып барды, — дейді соғыс ардагері.
Ол Жеңіс күнін қалай қарсы алғанын есіне алды.
— Жеңісті Кенигсбергте (Шығыс Пруссия) қарсы алдым. 8 мамыр күні Жеңіске жеткенімізді естіген кезде бір жылап, бір күліп, құшақтасып, жауынгерлер бір-бірімізді құттықтадық. Одан кейін Жапон соғысына аттандым. Ол аяқталған соң Солтүстік Кореяға соғысқа аттандым. Үш соғыстан аман қалдым, — деді ардагер.
Ұрыста көрсеткен жауынгерлік ерлігі үшін Отан соғысы ордені, II дәрежелі «Ерлігі үшін» медалімен наградталған.
— Ерекше қасиеті өте ашық адам, елдің барлығына жақсылық жасағанды жақсы көреді. Бәріне көмектескісі келіп жүреді. Еңбеққор жан. Әкеміз соғыс жылдарында басынан өткерген оқиғаларды қағазға түсіріп қойған. Алдағы уақытта соны кітап етіп шығарғымыз келеді, — дейді қызы Роза Сейсебаева.
Ардагер ұл-қыздарынан 10 немере, 20 шөбересі мен 1 шөпшек сүйіп отыр.
Бұған дейін Президент Телерадиокешені соғыс ардагері Жақан Сейсебаевқа құрмет көрсеткен болатын.
