Ресми: қазақстандық футболшы Дастан Сәтпаев «Челси» клубына ауысты

АЛМАТЫ. KAZINFORM — Алматылық «Қайрат» пен лондондық «Челси» клубы 16 жастағы шабуылшының трансфері бойынша келісімге келді.

Алматылық клубтың баспасөз қызметі хабарлағандай, 2026 жылдың жазында кәмелеттік жасқа толған соң ресми түрде ағылшын командасына қосылады. 
Ол уақытқа дейін Дастан Сәтпаев «Қайрат» сапында өнер көрсетеді. 

Дастан Алматыда дүниеге келген. 8 жасында «Қайрат» Академиясына түсіп, дайындықтың барлық сатысынан өтті.

Айта кетейік, 2024 жылдың мамыр айында Сәтбаев «Қайрат» командасында дебют жасаған ең жас ойыншы ретінде тарихқа енді. Өткен QJ лигасында жас футболшы 28 ойында 26 гол соғып, 10 нәтижелі пас берді. Сондай-ақ Сәтбаев маусымның үздік ойыншысы атағын алды. Ал УЕФА жасөспірімдер лигасында (U19) 16 жасар футболшы төрт матчта бір гол соғып, бір нәтижелі пас берді.

Бұған дейін танымал спорт журналисі Фабрицио Романо 16 жастағы қазақстандық футболшы Дастан Сәтбаевтың «Челсиға» ауысқанын хабарлаған болатын. 

Еске салайық, бұған дейін «Манчестер Сити» клубына өзбекстандық орталық қорғаушысы Абдуқодир Хусанов ауысқанын жазғанбыз.