Республикалық ақпараттық-насихаттау тобы елдің шығысында Елбасы Жолдауын түсіндіру жұмыстарын бастады - Өскемен
ӨСКЕМЕН. Қыркүйектің 16-сы. ҚазАқпарат /Людмила Малько/ - Қоршаған ортаны қорғау министрі Нұрғали Әшімов бастаған республикалық ақпараттық-насихаттау тобы Шығыс Қазақстанда Елбасы Жолдауының негізгі бағыттарының жүзеге асырылу барысын түсіндіру жұмыстарын бастады.
Топ мүшелері екі күн бойы Абай, Жарма, Зырян, Шемонаиха, Ұлан аудандарының елді мекендері мен Өскемен, Риддер, Семей және Зырян қалаларында кездесулер өткізеді. Республикалық ақпараттық-насихаттау тобының құрамына тоғыз адам кіріп отыр, олардың қатарына мәдениет және қаржы вице-министрлері Ғазиз Телебаев пен Руслан Даленов, Қазақстан халқы Ассамблеясы хатшылығының меңгерушісі Ералы Тоғжанов және басқалар бар.
Қоршаған ортаны қорғау министрі Нұрғали Әшімов бүгін Өскеменде «Өскемен титан-магний комбинаты» акционерлік қоғамының және Д.Серікбаев атындағы Шығыс Қазақстан мемлекеттік техникалық университетінің ұжымдарымен кездеседі, одан кейін «Нұр Отан» партиясының аймақтық кеңсесінде жеке мәселелер бойынша азаматтарды қабылдайды.
