РФ СІМ ресми өкілі: Эр-Риядтағы АҚШ-пен келіссөздерден серпіліс күтудің қажеті жоқ

АСТАНА. KAZINFORM – Ресей Сыртқы істер министрлігінің ресми өкілі Мария Захарова Г.В. Плеханов атындағы Ресей экономика университетінің студенттерімен кездесуде Эр-Риядта өтіп жатқан Ресей мен АҚШ арасындағы консультациялардан үлкен нәтиже күтпеуге шақырды, деп хабарлайды ресейлік БАҚ.

Захарованың айтуынша, Эр-Риядтағы кездесулер бірнеше бағыт бойынша жүріп жатыр және келіссөздер жабық есік жағдайында өтуде.

Бұған дейін Ресей делегациясының мүшесі, Ресей СІМ-нің бұрынғы орынбасары, сенатор Григорий Карасин келіссөздердің «шығармашылық сипатта өтіп жатқанын», сондай-ақ «өзекті мәселелер бойынша қызықты пікірталастар жүріп жатқанын» мәлімдеген еді.

Оның сөзінше, Мәскеу мен Вашингтон «байланысты сақтап, бір-бірінің ұстанымдарын түсініп жатыр».

Еске сала кетсек, бұған дейін Эр-Риядта Ресей мен АҚШ делегациялары арасында консультациялар басталғаны туралы хабарланған болатын.

Сондай-ақ, 23 наурызда Эр-Риядта АҚШ пен Украина делегацияларының келіссөздері өткен еді.