Әлем католиктері Рим Папасы Франциск үшін дұға етіп жатыр

АСТАНА. KAZINFORM – Ватиканның хабарлауынша, понтифик 8 күннен бері ауыр респираторлық инфекция диагнозымен Рим ауруханасында жатыр, деп хабарлайды Euronews. 

Ватикан 18 ақпанда понтификке тыныс жолдарының полимикробтық инфекциясы диагнозы қойылған соң ол емдеудің жаңа курсын алып, ауруханада тағы жатуы тиіс екенін хабарлаған. Ал келесі күні Рим Папасы Францискке екі жақты пневмония диагнозы қойылды. 

Понтифик 14 ақпанда Римдегі ауруханаға жатқызылды. Францисктің дәрілік терапиясы екі рет түзетілді.

— Түн жақсы өтті, бүгін таңертең Папа Франциск тұрып, таңғы ас ішті, — делінген Ватинканның соңғы мәлімдемесінде.

Бір күн бұрын понтификтің клиникалық жағдайы жақсарып, қызуы қалыпқа келгені хабарланған.

Франциск 88 жаста. Бала кезінде оның өкпесінің бір бөлігі алынып тасталды, бұл оны өмір бойы өткір респираторлық инфекцияларға осал қарайтын етті.

Иерусалимнің Латын Патриархы кардинал Пьербаттиста Пиццабалла католиктерді «сенімдегі бір отбасы болып» жиналып, Рим Папасының «денсаулығы мен амандығы» үшін бірге дұға етуге шақырды.

— Біз месса кезінде де, үйлерімізде де, жүрегіміздің тыныштығында да жалынды дұғаларымызды айтамыз, Құдайдан Рим Папасы Францискке даналықпен, кішіпейілділікпен және сүйіспеншілікпен шіркеуді басқару жөніндегі қасиетті миссиясын жалғастыра алатындай денсаулық пен күш-қуат беруін сұраймыз, — деді Пиццабалла.

Понтифик денсаулығына байланысты отставкаға кету туралы шешім қабылдауы мүмкін деген болжам бар.

Еске сала кетсек, 2024 жылдың көктемінде Рим Папасы Қазақстанда су тасқынынан зардап шеккендер үшін дұға етуге шақырды. 

2024 жылдың 19 қаңтарында мемлекет басшысы Рим Папасының шақыруымен Қасиетті Таққа алғашқы ресми сапарын жасады.