SAT емтиханынан 1530 балл жинаған қазақстандық оқушы Berkeley университетіне түсті
АСТАНА. KAZINFORM — Алматылық Мансұр-Сойор Досанов University of California, Berkeley университетіне математика және физика бағыты бойынша оқуға қабылданды, деп хабарлайды Оқу-ағарту министрлігінің баспасөз қызметі.
АҚШ университеттеріне түсуге дайындықты Мансұр 2023 жылы бастады. Оқуға түсу үшін қажет SAT халықаралық емтиханының қорытындысы бойынша ол 1600 мүмкін балдың 1530-ын жинады. Сонымен қатар Мансұр ағылшын тілі бойынша халықаралық IELTS емтиханынан 8.5 балл алды. Бұл нәтижелер — көпжылдық еңбектің, үздіксіз оқу мен тәртіптің, сондай-ақ өзін-өзі дамытуға бағытталған тұрақты жұмыстың жемісі.
Мансұр өмірінің алғашқы күндерінен бастап церебралды сал ауруы диагнозымен өмір сүріп келеді. Қиындықтарға қарамастан, ол білім алып, дамып, өз мақсаттарына сенімді түрде ұмтылды. Мансұрдың оқиғасы инклюзивті білім беруді дамытудың және әр баланың өз әлеуетін ашуына мүмкіндік беретін жағдай жасаудың қаншалықты маңызды екенін көрсетеді.
Оның жетістіктерінде отбасының қолдауы ерекше рөл атқарды. Мансұрдың ата-анасы ұлын әр кезеңде қолдап, оның дамуына барлық жағдайды жасап келеді.
Мансұр жүзумен айналысады, аспаздыққа қызығады және саксофонда ойнайды. Музыкалық аспапты меңгеру мен оқуға түсуге дайындалу одан үлкен ерік-жігерді талап етті.
Бүгінде оның жетістігі отбасының қолдауы, жүйелі еңбек пен білімге ұмтылыс үлкен мақсаттарға жетуге мүмкіндік беретінінің жарқын үлгісі болып отыр.
University of California, Berkeley — әлемдегі жетекші зерттеу университеттерінің бірі. Бұл оқу орнымен ондаған Нобель сыйлығының лауреаттары байланысты, ал оның ғылыми мектебі математика, физика, инженерия және компьютерлік ғылымдар салаларындағы ең мықты мектептердің бірі саналады. Berkeley университетіне түсу АҚШ университеттері арасындағы ең жоғары бәсекелі қабылдаулардың бірі болып есептеледі.
Бұдан бұрын ҰБТ-да 132 балл жинаған атыраулық түлек Оңтүстік Корея университетіне оқуға түскенін жаздық.
