Сенатор Ләззат Тұрлашов Венада экономика жөніндегі өңірлік семинар жұмысына қатысуда

АСТАНА. ҚазАқпарат - Қазақстан Республикасы Парламенті Сенатының депутаты Ләззат Тұрлашов 27 шілдеде Вена қаласында өтіп жатқан Орталық Азия мен Кавказ елдерінің парламентшілеріне арналған экономика жөніндегі өңірлік семинардың жұмысына қатысуда.

Шараны Вена Біріккен институты мен Халықаралық Валюта қоры ұйымдастыруда. Бұл туралы Сенаттың баспасөз қызметінен хабарланды. Семинардың мақсаты Орталық Азия мен Кавказ елдерінің алдында тұрған экономикалық проблемаларды тереңнен зерттеу, жалпы әлеуметтік-экономикалық мәселелер мен даму мәселелері бойынша талқылау және пікір алмасу болып отыр. «Бұл ретте шараға қатысушылар өңірдегі экономикалық басқарудың әртүрлі қырларын қарастырады. Оған өңірдегі ХВҚ мен ДСҰ-ның рөлін бағалау, анағұрлым өзекті экономикалық мәселелерді талқылау және бірінші кезектегі реформалар саясатын әзірлеп, іске асыру кіреді» делінген баспасөз баянында.