Шәмші Қалдаяқовтың әндері стримингтік платформаларда ресми жарияланады
АЛМАТЫ. KAZINFORM - Қазақстанның Халық әртісі, сазгер Шәмші Қалдаяқовтың әндері алғаш рет әлемнің жетекші стримингтік платформаларында ресми түрде жарияланады.
«Шәмші әлемі» қоғамдық қорының директоры Ботагөз Қалдаяқованың айтуынша, тәжірибе үшін алдымен Spotify, Yandex Music, YouTube және басқа да платформаларға әуенін де, сөзін де Шәмші жазған “Құшақ жайған қандай адам” әні орналастырылған. Енді композитордың 95 жылдығына арналған альбом «Шәмші әлемі» қоғамдық қорының және «õzen» музыкалық дистрибьюторының қолдауымен 14 наурызда жарыққа шығады.
- Авторлық және сабақтас құқықтар туралы заңға сәйкес монетизациядан табыс алу үшін әндердің мәтін авторларымен келісім болуы керек. Сондықтан Шәмшінің 70-ке жуық әнінің сөзін жазған авторлармен байланысып, 45-іне байланысты келісімге келдік. Содан кейін барып біз заңды түрде ресми әндерді платформаларға жариялағалы жатырмыз. Біз авторлық құқық туралы заңды сақтай отырып, қалай стримингке шығуға болатынын үлгі ретінде көрсеткіміз келеді, - деді Ботагөз Қалдаяқов.
Айта кеткен жөн, «Шәмші әлемі» қоғамдық қоры композитордың музыкасының эксклюзивті құқықтарына ие болды. Aл 2025 жылдан бастап ән мәтіндерінің құқықтарын да басқарады.
- Бұл бастамадан кейін өзге авторлардың мұрагерлері авторлық құқық бойынша мәселелерді шешу, лицензиялау, заңдастыру бойынша жұмыс істей бастауы мүмкін. Қазіргі уақытта стриминг қарқынды дамып келеді. Ертең платформаларда Шәмші әндерінің бірінші альбомы жарияланады, болашақта екіншісін де жарыққа шығарамыз деп үміттенемін, - деді «õzen» музыкалық дистрибьюторының өкілі Тимур Назарғалиев.
Еске салайық, бұған дейін Шәмші Қалдаяқовтың ұрпақтары композитордың әндерінен қанша қаламақы алып жүргенін жазған едік.
Сондай-ақ Қазақстанда авторларға арналған бірыңғай цифрлық платформа құрылуы мүмкін екенін жазғанбыз.
