Шешімді қорықпай қабылдау қажет — Антикор басшысы шенеуніктер жайлы
АСТАНА. KAZINFORM — Мемлекеттік қызметшілер тексеруші органдардан қорқатындықтан шешім қабылдау барысында жиі қауіптенеді.
Бұл жайында Сыбайлас жемқорлыққа қарсы іс-қимыл агенттігінің төрағасы Асхат Жұмағали Jibek Joly телеарнасының «Уәде» бағдарламасына берген эксклюзивті сұхбатында айтты.
Оның айтуынша, ұзаққа созылатын келісім рәсімі мен шенеуніктердің батылсыздығы мәселенің шешілмей қалуына алып келеді. Ал қабылданған шаралар өзектілігін жоғалтып алады.
— Мемлекет басшысы шенеуніктердің шешім қабылдау керектігіне, қорықпауы тиістігіне назар аудартты. Әрине, бұл тұрғыдан келгенде шешеунік кемеліне жеткен, өз ісінің шебері болуы тиіс, — деді Асхат Жұмағали.
Агенттік төрағасының атап өтуінше, мемлекеттік қызметші өзінің іс-әрекеті заң аясында болса және бастамалары экономикалық тиімділікке бағытталса, онда қорықпай шешім қабылдауы қажет.
Жемқорлық неге тыйылмай тұр
Антикор басшысы пара беру мен алуға қатысты ахуалға орай да пікірін білдірді. Оның пайымынша, пара беруді дәстүрге айналған деуге болмайды. Бірақ, бұл мәселе әлі де болса өзектілігін жойған жоқ. Мәселен, 2024 жылы агенттік 87,7 млрд теңге бюджет қаражатының ұрлауына жол бермеді.
— Пара беруге уәде ету немесе ұсынуды қылмысқа жатқызу мәселесі қарастырылуда. Халықаралық сарапшыларымыздың ұсынымына сәйкес және халықаралық тәжірибеге орай бұл да айтарлықтай тежеуші фактор болады, — деді Асхат Жұмағали.
Бұған дейін Антикор басшысы еліміздегі цифрлық «боялған» ақша жобасының алғашқы нәтижесі жайлы айтып бергенін жазған едік.
