Шетелдік БАҚ-тағы Қазақстан: министрдің АҚШ телеарнасына сұхбаты, Еуропадан $175 млрд , Тәжікстанға жеңілдік
Өткен апта шетелдің баспасөзі Қазақстанның жасыл энергетика, цифрлық жүйесі туралы жазса, бұл апта Еуропалық инвесторлардың елімізге оң көзқарасы, Орталық Азия, оның ішінде Қазақстанның транзит дәлізі ретінде әлеуеті артқанын хабарлады. Сондай-ақ, қазақстандық шенеунік АҚШ телеарнасына сұхбат берді. Бұдан бөлек халықаралық басылымдар елімізге қатысты қандай ақпарат жазғанына Kazinform сарапшысы шолу жасады.
Орталық Азия сауда дәлізіне қызығушылық артты
Шетелдік БАҚ осы аптада Орталық Азия елдері, оның ішінде Қазақстанның сауда дәлізі ретінде әлеуеті күшейгенін жазды. voanews.com басылымының Вашингтоннан хабар таратқан тілшісі «орта дәліздің пайда болуы – Азияны Орталық Азия, Каспий теңізі және Кавказ арқылы еуропалық нарықтармен байланыстыратын транзиттік желі Ресейдің бақылауындағы маршруттарға балама ретінде тез қарқын алып жатыр» деп жазды.
Басылым Транскаспий халықаралық көлік маршруты (TITR) қауымдастығының басшысы Гайдар Әбдікерімовтің қызметі туралы баяндады. Қазір бұл қауымдастықтың желісінде порттар, кемелер, теміржол мен терминалдарды қоса алғанда, 25 көлік-логистикалық компания бар. Сонымен қатар, оған 11 мемлекет кіреді: Әзербайжан, Грузия, Қазақстан, Түркия, Украина, Польша, Румыния, Болгария, Литва, Қытай және Сингапур.
– Мұның бәрі біздің бағытымызға қызығушылықтың жоғары екенін білдіреді... Соңғы 10 айда бағыт бойынша 2,256 миллион тоннадан астам жүк тасымалданды. Біз транзиттік контейнерлік пойыздарды жеткізудің болжамды уақытын 38 күннен 19 күнге дейін қысқарттық, – деп келтірді басылым Әбдікерімовтің сөзін.
Сондай-ақ, басылым «Әбдікерімовтің кеңсесі Қазақстанның бас қаласы Астанада орналасқан. Мұнайға бай республика Қытайдың солтүстік-батыс шекарасынан Каспий теңізіне дейін созылып жатыр, жүктерді кемелерге тиеп, Кавказдағы Әзербайжанға жеткізуге болады» деп жазды.
Айта кетейік, Орталық Азия және Қазақстанның алдағы бағыты қандай болады? Осы және өзге де мәселелерді елорда төрінде жиналған халықаралық сарапшылар талқылады. Бұл туралы мына жерде жазғанбыз.
Еуроодақ елдерінен Қазақстанға құйылған инвестиция көлемі белгілі болды
Қазір Еуропалық Одақ – Қазақстан үшін ең ірі сауда және инвестициялық серіктес. Еуропадан елге құйылған инвестицияның жалпы көлемі 175 миллиард доллардан асты. Бұл туралы ҚР премьер-министрі Әлихан Смайылов «Қазақстан-Еуропалық Одақ» диалогтық алаңының 13-ші отырысында айтты. Мұндай ақпаратты әзербайжандық trend.az жазды.
– Атап айтқанда, соңғы 6 айда Еуроодақ елдері Қазақстан экономикасына 5,2 миллиард доллардан астам инвестиция салғанын жеткізді. Сондай-ақ, премьер-министр Еуропалық Одақтың Қазақстанның сыртқы саудасындағы үлесі шамамен 30 пайызды құрайтынын атап өтті. Оның айтуынша, 10 айда тараптар арасындағы жалпы тауар айналымы 34 миллиард доллардан асты. Премьер-министр бұл көрсеткіштер сауда-экономикалық ынтымақтастықты нығайтудың дәйекті бағытын көрсететінін атады, – деп жазды басылым.
Сондай-ақ, trend.az Әлихан Смайыловқа сілтеме жасап, қазіргі таңда Қазақстан экономикасының түрлі салаларында 3 мыңнан астам еуропалық компания табысты жұмыс істеп жатқанын, оның ішінде Shell, Eni, Air Liquide, Alstom және Claas сияқты ірі трансұлттық корпорациялар бар екенін хабарлады.
Қазақстан KPI зауытында полипропилен өндірісін екі есеге арттыруды жоспарлап отыр
Уahoo.finance басылымы Reuters агенттігіне сілтеме жасап, қазақстандық Қазмұнайгаз компаниясының жоспары туралы жазды. Басылым компанияның ресми сайтына кіріп, қызметіне қатысты негізгі «сандар» туралы қысқа ақпарат беріпті.
– «ҚазМұнайГаз» (ҚМГ) мемлекеттік мекемесі басқаратын KPI зауыты полипропилен өндірісін келесі жылы биылғы 188 800 тоннадан 487 500 метрикалық тоннаға дейін ұлғайтуды жоспарлап отыр... KPI аймақтағы ең ірі полипропилен өндірушісі. Осы жылдың қаңтар-қараша айларында KPI 156 404 тонна полипропилен өндірді, оның 138 435 тоннасы Түркия, Қытай, Еуропа және Ресейге экспортталды. Ол 218 568 тонна пропанды өңдеді, – деп еліміздің полипропилен өндірісіне ерекше назар аударған болатын.
Қазақстан сирек материалдарды жеткізуші ретінде маңызды рөл атқара алады – министр
Агроөнеркәсіп және құрылыс министрі Қанат Шарлапаев америкалық CNBC телеарнасына берген сұхбатында Қазақстанның маңызды шикізатты Еуропаға көбірек жеткізе бастағаны туралы бөлісіп, ArcelorMittal компаниясымен келісімнің сәтті аяқталуын талқылады.
Министр басылымға Қазақстан қазірдің өзінде Еуропалық комиссия тізбектеген 34 сирек кездесетін материалдың 18-ін сәтті шығарып жатқанын мәлімдеді.
Сондай-ақ, министрден ArcelorMittal компаниясымен жақында жасалған сәтті келісім туралы сұралды.
– Ол тараптардың өзара келісімі негізінде сәтті аяқталды. ArcelorMittal өзінің қазақстандық бөлімшесін мемлекет пайдасына сатуға шешім қабылдады, алайда компания жұмысын жалғастыра беретінін атап өткен жөн. Бұл Орталық Азия үшін бірегей болат өндіруші және компанияның жылына 4 млн тоннаға дейін металл өнімдерін шығаруға мүмкіндігі бар, - деді Қанат Шарлапаев.
Қазақстан Тәжікстанға теміржол жүк тасымалына жеңілдіктер ұсынады
Қазақстан темір жолы Тәжікстанның жүк тасымалдаушыларына 30%-дан 50%-ға дейін жеңілдіктер ұсынып, жүк көлемін ұлғайтуға жәрдемдеседі. Бұл туралы Қазақстанның Тәжікстандағы елшісі Уәлихан Тұраханов Тәжікстанның көлік министрі Азим Ибрахиммен кездесуде айтты. Бұл туралы trend.az басылымы жазды.
– Қазіргі таңда екі ел арасында бес автомобиль бағыты бар, ал биыл 11 айда жолаушылар тасымалы 5259 адамды құрады. Кездесуде тараптар жол-көлік саласындағы ынтымақтастықты кеңейту жоспарларын талқылап, көлік саласында кеңейтуге ниеттерін білдірді, – деп жазды басылым.
