Шығыс Қазақстанның тағы бір қаласында жылыту маусымы басталды

ӨСКЕМЕН. KAZINFORM — Шығыс Қазақстан облысы Алтай қаласында жылыту маусымы басталды.

Бұған қатысты Алтай ауданының ТҮКШ, жолаушы көлігі, автомобиль жолдары және тұрғын үй инспекциясы бөлімі басшысының бұйрығы шықты.

— 29 қыркүйектен бері ауданның әлеуметтік нысандарына жылу беріліп келеді. Ал 30 қыркүйектен Алтай қаласындағы көпқабатты және жер үйлерге жылу беріле бастады. Жылуға қосылу кезең-кезеңімен жүзеге асырылады, — деп хабарлады аудан әкімдігінен.

Еске салсақ, Шығыс Қазақстан облысы Риддер қаласында 24 қыркүйектен бері жылу беріле бастаған. 

Ал Өскемен қаласында 1 қазаннан бастап үйлерге жылу берілетіндігі хабарланған.