ШҚО-дағы Алтай ауданында аулалардан су сорылып, жағдай тұрақталды
ӨСКЕМЕН. KAZINFORM – Шығыс Қазақстан облысы Алтай ауданында аулалардан су сорылып, жағдай тұрақталды.
Кеше Алтай ауданында Бұқтырма өзенінің су деңгейі көтеріліп, жер үйлер маңындағы аумаққа су жайылған болатын. Абырой болғанда, үйлерге су кірген жоқ.
Оқиға орнына құтқарушылар мен жергілікті атқарушы орган қызметкерлері шұғыл келіп жеткен. Барлығы 20-дан астам ауладағы су сорылды.
«Тәулік бойы жүргізілген жұмыстардың арқасында тұрғын үй аумақтарынан қызыл су бұрылды. Барлығы 370 ыдыс-қап төселіп, 1335 тонна инертті материал төгілді. Мотопомпалармен 27800 текше метр су сорылды. Жағдай тұрақталды», - деп хабарлады ШҚО төтенше жағдайлар департаментінің баспасөз қызметінен.
Еске салсақ, осыған дейін Алтай ауданында үйлерді су басқаны жайлы жалған ақпарат тарағаны хабарланған.
