Ішімдіктен бас тарту – халықтың саналы таңдауы, ол нәтиже беріп отыр – Бас прокурор

АСТАНА. KAZINFORM – ҚР Бас прокуроры Берік Асылов өзінің Х әлеуметтік желісіндегі парақшасында еліміздің көптеген аймақтарында тұрғындардың ішімдіктен бас тартуына байланысты жазба жариялап, өзінің пкірін білдірді.

- Азаматтар жауапкершілікті өз мойнына алғанда — шынайылық өзгереді. Еліміз бойынша жүздеген ауылдар өз еркімен спиртті ішімдіктерді сатудан бас тартуда,- деп жазды ол.

Бас прокурордың пікірінше, бұл — қарапайым халықтың саналы таңдауы. Тәртіп, денсаулық және балаларының болашағы үшін жасалған шешім. Мәселен, Маңғыстау облысының Маңғыстау ауданындағы бір ауылда тұрғындар ішімдікті сатудан өз еркімен бас тартып, бұл туралы бейнероликті әлеуметтік желілерде жариялады. Осындай мысалдар Ақмола, Жамбыл, Қарағанды, Атырау және басқа да облыстарда кездеседі.

- Иә, бұл елдегі барлық ауыл санын ескерсек, теңізге тамған тамшыдай көрінуі мүмкін. Бірақ бастысы — жағдайдың оң серпіні бар. Мұндай елді мекендер саны артып келеді. Адамдар сенім мен тұрақтылықты, тыныштықты жоғары бағалап, бір-біріне үлгі бола бастады, - дейді Берік Асылов.

Сондай-ақ ол бастаманың ауыл ақсақалдары мен Қоғамдық кеңестерден шығып, прокуратура, полиция және жергілікті әкімдіктердің тарапынан үйлестіру, алдын алу және қауіпсіздік қамтамасыз етілгенін атап өтті.

- Ауыл кәсіпкерлері ерекше алғысқа лайық. Жерлестерінің үнін естіп, олар дүкен сөрелерінен ішімдікті өз еркімен алып тастады. Күмәнданғанмен, табыстары азайған жоқ. Керісінше, ауыл тұрғындары ішімдіктің орнына балаларға пайдалы азық-түліктерді жиі сатып ала бастады. Нәтижелер өздігінен көрініп тұр: кейбір ауылдарда қылмыс мүлде жойылды, тұрмыстық жанжалдар тоқтады, жастар спорт пен саналы өмір салтын таңдай бастады. Бұл — «Заң және Тәртіп» қағидатының өмірдегі нақты көрінісі. Тәртіп қорқынышпен емес — сеніммен, жаза арқылы емес — саналы таңдаумен орнайды. «Заң мен Тәртіп — кемел демократияның іргетасы әрі құқықтық мемлекеттің негізі», – деп Мемлекет басшысы атап өткен еді. Біз болашаққа деген қамқорлық, қоғамдық келісім және заңға құрметке негізделген әрбір бастаманы қолдаймыз, - деді ведомство басшысы.

Сөз соңында ол ресми статистика бойынша биылғы алғашқы үш айда алкогольдік мас күйінде жасалған қылмыстар саны азайғанын мәлім етті.

Осыған дейін Түркістан облысында ішімдіктен бас тартқан ауылдар саны 60-тан асқанын жаздық.  

Сондай-ақ Ақтөбе облысында ішімдіктен бас тартқан 33 ауыл бар екені жазылды.