СҚО тұрғыны әлеуметтік желіде ауыл тұрмысы мен қазақы өнерді насихаттап жүр
ПЕТРОПАВЛ. KAZINFORM – Солтүстік Қазақстан облысының тұрғыны Жайнагүл Темірханова белгілі актриса Самал Еслямованың ауылдасы. Ол #Qazalemi байқауына қатысып, туған жерінен видео жариялады.

Он саусағынан өнер тамған шебер, бесаспап маман Жайнагүл Маралқызына қолөнершілік әжесінен дарыған. Кішкентайынан кейуананың қасында отырып, инесін сабақтап, мата қиындыларынан қуыршағына көйлек тігетін. Қазір қолы бос уақытта қазақи дүниені - қыз жасауына арналған көрпе-жастық, диван жапқыштар, балалар жамылғысын, ұлттық киімдер, қоржындар тігеді. Кестені де, тоқуды да меңгерген.

- Қазағым «үйрен де жирен» деп бекер айтпаған ғой. Білгеннің пайдасы болады. Мәселен пандемия басталып, үйден шыға алмай қамалып қалғанда қолыма ине-жіп алдым. Алғашқы көрпемді анама тіктім. Біткен дүние өзіме де, анама да ұнады. Көрпені суретке түсіріп, әлеуметтік желіге салып едім, қызығып, тапсырыс бергендер болды. Тек бір жылда жүзге жуық көрпе-жастық тіккен екенмін, - дейді Жайнагүл Темірханова.

Жайнагүл Маралқызының негізгі мамандығы – музыкант. Ақан сері атындағы облыстық филармонияның домбырашысы.
- Алғаш қолыма домбыраны жеті жасымда алып, содан бері тастаған емеспін. Үйдегі апа-сіңлілерім де музыкаға жақын. Гитарада ойнаймыз, бірер жыл бұрын жетіген аспабын меңгердік. Отбасылық мерекелерде, басымыз қосылғанда шаңырақтан ән-күй үзілмейді.
Бізден көріп балаларымыз да, жиендер де өнерге қызығушылық танытып, үйреніп жатыр, - дейді Петропавл тұрғыны.

Жайнагүл Маралқызы қазір қалада тұрғанымен, жұмысынан қолы қалт етсе, туған ауылына асығады. Аққайың ауданы Аралағаш ауылында оның ата-анасы тұрады.
- Ауылым - ең сүйікті мекенім, сол себепті демалыс күндері, бос уақыт бола қалса, көңіл ауылға тартып тұрады. Қаланың қым-қуат тіршілігінен шаршап барғанда қасиетті мекенімнен күш аламын.

Ұлдарымды да ауылға жиі апарамын, жазғы демалысты олар ата-әжелерінің қастарында өткізеді. Үй шаруасына көмектеседі, отын да жарады, арам шөп те жұлады. Әсіресе ер бала қайдан шыққанын біліп, ауылмен байланысты үзбеуі тиіс, - дейді кейіпкеріміз.
Қаймағы бұзылмаған қазақы ауылдың қысқы көрінісін Жайнагүл Темірханова Нұрлан Қоянбаев #Qazalemi хештегімен жариялаған байқауға ұсынды.
- Әр адам үшін туған мекенінен ыстық, оған жетер жер жоқ. Бұл байқау көпшілікке туған өлкесімен мақтануға тағы бір мүмкіндік. Бізде асқаралы тау болмағанымен, қарасаң көз жетпейтін жазық дала, қайыңды-қарағайлы ну орман бар. Еліміздің табиғатының бір ерекшелігі де осы ғой, - дейді Жайнагүл Темірханова.

Бұған дейін видеолары арқылы көпшілікке Қарқаралы табиғатын паш етіп жүрген құтқарушы Олжас Төлеубекпен таныстырған едік.