Спорт: енді легионерлерді демеушілер қаражатына ғана тартуға болады

АСТАНА. KAZINFORM – ҚР Туризм және спорт вице-министрі Серік Жарасбаев еліміздің спортындағы легионерлерге қатысты пікір айтты.

— Легионерлерге қатысты қоғамда көптеген сұрақ қойылған еді. Қазіргі көрсеткіштерге тоқталсақ, футболдан былтырғы премьер-лигада 14 клуб ойнады. Оның ішінде 325 футболшының арасында 149 легионер болған, яғни 50 пайызға жуығын құрады. Спортқа қатысты заң (Парламент қабылдады) күшіне енгеннен кейін, оларды бюджеттен және квазимемлекеттік сектордан ары қарай қарай қаржыландыру тоқтатылады. Осы орайда біз бұған дейін барлық өңірлердегі клубтарға, федерацияларға жаңа тәртіп күшінен енетінін ескерттік, — деді С. Жарасбаев Сенатта тілшілер сұрағына жауап бере отырып.

Оның айтуынша, хоккей спортында қазір 109 легионер бар. Ал қалған спорт түрлерінде олардың саны көп емес.

— Аталған заңда бюджеттен және квазимемлекеттік сектордан қаржылындыруға тыйым салынып отыр. Егер болашақта белгілі бір аймақтық клуб өз қатарына басқа елдерден спортшы шақырғысы келсе, оған тыйым салынбайды. Бірақ оған төленетін жалақысы мен келісімшартын бюджеттен тыс қаражаттан өтейді, яғни демеушілік көзден тартады, — деді вице-министр.

Бұдан бұрын хабарланғандай, Сенат «Қазақстан Республикасының кейбір заңнамалық актілеріне дене шынықтыру және спорт, сондай-ақ артық заңнамалық регламенттеуді болғызбау мәселелері бойынша өзгерістер мен толықтырулар енгізу туралы» Заңын мақұлдады. 

Оның аясында Қазақстан Республикасының азаматтары саналмайтын спортшыларды бюджет қаражаты есебінен қаржыландыруға тыйым салынды.