Су қоймалары көктемге дайын ба: 1500-ден аса гидротехникалық құрылыс тексеруден өтті

АСТАНА. KAZINFORM —   Су және ирригация министрлігінің бассейндік инспекциялары Төтенше жағдайлар министрлігі және жергілікті атқарушы органдармен бірлесіп еліміздегі 1502 гидротехникалық құрылысқа зерделеу жүргізді. Бұл шара  су тасқыны кезеңіне дайындық аясында жүргізілді, деп хабарлады ведомстводан. 

Тексеру нәтижесінде гидротехникалық құрылыстардың иелеріне анықталған кемшіліктерді жою бойынша ұсыныстар берілді. Айта кетейік, елімізде 8 бассейндік инспекция бар. Ол Арал-Сырдария, Балқаш-Алакөл, Ертіс, Есіл, Жайық-Каспий, Нұра-Сарысу, Тобыл-Торғай және Шу-Талас бассейндік инспекциялары.

«Барлық су қоймалары бекітілген кесте бойынша жұмыс істейді, жоспар су тасқынына қатысты болжамдарға байланысты түзетілетін болады. Көктемгі су тасқыны кезінде еріген қар суын қабылдауға бос орынды қамтамасыз ету үшін елдің солтүстік, батыс, шығыс және орталық су қоймаларынан су жіберілді. Қазақстанның оңтүстігіндегі су қоймалары су жинау режимінде жұмысын жалғастыруда», - деп мәлімдеді Су ресурстарын реттеу, қорғау және пайдалану комитеті төрағасының міндетін атқарушы Гүлмира Имашева.

Еске сала кетейік,  бұған дейін жазғанымыздай cу тасқыны келер жылы да қайталана ма, саладағы сарапшылар қандай болжам айтып отыр, дайындық жүргізіліп жатыр ма деген сауалға жауап іздесеңіз, осы мақаланы оқи отырыңыз. 

Ақмола облысындағы «Қазсушар» филиалы Сілеті су қоймасындағы қақпаларды жөндегенін жазған едік.