Су тасқыны: Ақтөбе облысының Қобда ауданында жаңа үйлердің іргесі қаланып жатыр
АСТАНА. KAZINFORM – Ақтөбе облысы Қобда ауданында су тасқынынан үйсіз қалған тұрғындарға жаңа баспана салу қолға алынды.
«Бүгінде аудан бойынша үйін су басқан тұрғындардан 292 өтініш келіп түсті, арнайы комиссия жұмысын жалғастыруда. Қазір 120-дан астам үйдің құрылысы басталуы керек, аудан бойынша апаттық жағдайда 150 үй тіркелді», - деді Қобда ауданының әкімі Ізгілік Тынымгереев «Біз біргеміз» телемарафонында «Хабар» телеарнасына сұхбат беріп.
Тұрғын үйлер шамамен 2 ай көлемінде қолданысқа берілуі тиіс. Құрылыс қарқыны жергілікті биліктің бақылауында.
Айта кетсек, су тасқынының зардабын шеккен 5 мыңнан астам отбасыға атаулы әлеуметтік көмек автоматты түрде тағайындалды.
Сондай-ақ, төтенше жағдай жарияланған өңір жастарының несиесін өтеу кейінге шегерілді.
