Су тасқыны: Ақтөбеде бір ауданға апарар көпірді жөндеуге 4 млрд теңге жұмсалады
АҚТӨБЕ. KAZINFORM – Ақтөбеде су шайған, су өткен жол, көпірді жөндеуге 15 млрд теңгеден астам қаржы қажет. Бір ғана Ойыл ауданына кіреберіс көпірді қалпына келтіруге 4 млрд теңгеге жуық қаржы жұмсалмақ.
Ақтөбеде облыстық, аудандық маңызы бар жолдарда тасқыннан кейінгі қалпына келтіру жұмысы жүргізіліп жатыр. Биыл көктемде су өту, су шаю бойынша барлығы 51 факті тіркелген. Су тасқыны салдарынан «Шұбарқұдық-Ойыл-Қобда», «Ақтөбе-Шұбарқұдық», «Покровка-Темір-Кеңкияқ-Ембі» бағытындағы облыстық маңызы бар жолдың асфальт жабындысы, көпірлер, кіреберіс жолдар зақымданды.
– Ойыл ауылына кіреберіс жолдағы көпірлердің тірегі мен аралық құрылымы және осы аудандағы Қаратал, Көптоғай, Амангелді, Қайыңды, Қараой, Қобда ауданындағы Қанай, Байтақ, Көк үй, Өтек, Жарық, Сарыбұлақ, Бестау, Әйтеке би ауданыныдағы Әйке, Мұғалжар ауданындағы Темір-Көпір, Темір ауданындағы Тасқопа, Жамбыл елді мекендерінің кіреберіс жолдары зақымданған. Аталған учаскелерді жобалаушы компаниялар мен «Қазақстан жол ғылыми зерттеу инситуты» АҚ-ның мамандарымен бірлесіп қарап, зерттеу жұмыстары жүргізілді. Нәтижесінде 47,2 шақырым жол жабындысы, 23 көпір және 100 су өткізгіш құбырды қалпына келтіру және осал жерлерді нығайту қажет. Учаскелерді қалпына келтіру бойынша бүгінде жобалық-сметалық құжаттамалары дайындалып, сараптамадан өтуде. Алдын-ала есептеулерге сәйкес, 15,6 млрд теңге қаржы қажет екені анықталып отыр. Оның ішінде облыстық маңызы бар жолдарға 5,4 млрд теңге, аудандық маңызы бар жолдарға 10,2 млрд теңге, - деп хабарлады Ақтөбе облысы әкімінің баспасөз қызметі.
Ведомстваның хабарлауынша, Қобда-Ойыл, Шұбарқұдық-Ойыл-Қобда, Ойыл және Ақкемер ауылдарында су тасқынынан зардап шеккендерге арнап салынып жатқан жаңа үйлер маңына ауылішілік жол, Ойыл ауылына кіреберіс көпір құрылысы басталды.
– Алдымен көпірдің үстінгі қабатын қырып алады. Кейін төмендегі тіректерін ауыстырады. Негізі зақымданған бөлігіне басымдық береді. Бұл жұмыстарға 4 млрд теңгеге жуық қаржы қажет. Жобалық-сметалық құжат дайын. Қаржыны Үкімет резервінен сұрап отырмыз. Ал қазір мердігер мекеме өз қаржысына жөндеу жұмысын бастап кетті, - деді Ақтөбе облыстық жолаушылар көлігі және автомобиль жолдары басқармасы басшысының орынбасары Есет Аманбаев.
Еске салсақ, биыл көктемде Ойыл ауданына кіреберістегі көпір жарамсыз болып қалып, елімізде алғаш рет пантон көпір тұрғындардың қатынас құралына айналды.
