«Техникалақ ақау»: Ақтөбеден Астанаға ұша алмаған жолаушылар шағымын жеткізді
АҚТӨБЕ. KAZINFORM — FlyArystan әуе компаниясының Ақтөбе-Астана бағытындағы рейсі бірнеше рет кейінге шегерілді. Компания әуежайға техникалық ақау себеп екенін айтқан.
FlyArystan әуе компаниясының № 7394 рейсі кеше ұшуы тиіс еді. Алайда жолаушылардың күтіп, үйіне, қонақүйге кері оралуына тура келген.
— Біз кеше сағат 22:30–да әуежайға келдік. Рейс түнде жүруі тиіс еді. Төрт сағат отырып, айқау-шу шыққан соң ғана «ұшпайтын болдық» деп айтты. Әуежайда таң атырып, сағат 9:30–да қонақүйден нөмір берді. Екі сағат ұйықтағандай болып, кері әуежайға барайын десек, көлік болмады. Автобусты да айқай-шумен сұратып алдық. Ақтөбе қалалық көлік прокуратурасы арыз қабылдағанымен, еш нәтиже жоқ, — деді жолаушы Сабина.
Ал жолаушы Аманжол Мұсаұлының айтуынша, жолаушылардың бәріне бірдей қонақүй нөмірі жетпеді, кейбірі тума-туысын жағалап кеткен.
— Біз 17 ақпан күні сағат 00:20–да, яғни, түнде ұшуымыз керек еді. Әуежайға келген соң оны 00:50–ге ауыстырды. Дәл осы кезде Ақтауға, Алматыға өзге ұшақ ұшты, біз қалдық. Рейске отырған кезде «ауа райына байланысты сәл кеш ұшамыз» деп шегере берді. Сөйтіп ұшақ бортында 4 сағат отырдық, кейін әуежайға кіргізді. Ол кезде де ауа райы деп айтты. Әуежай қызметкерлері ауа райынан емес, ұшақтан деп түсіндірді. Мұз қатып, ерітетін техника болмаған деп айтты. Су да, тамақ та бермеді. «Қонақүйде 20 орын бар, соған ғана адам аламыз» деп айтқан соң мүгедектігі бар адамдар, балалар мен жас аналарға орын бердік. Қалғанымыз әуежайда қалдық, кейбірі пәтер жалдады. Айқай-шу болған соң тағы 12 орын ұсынды. Оған да барып, қалғаны әуежайда қалды. Сағат 13:00, 15:00, 17:00–деп өзгерте берді. Қазір «ұшақ зақым алған» деп айтып тұр. Билетті қайтарып, жаңа билет алуды ұсынды. Оның бағасы 140 мың теңге. Ал біз билетті 20 мың теңгеге алған едік. Бұзылған ұшақтың қашан іске қосылатынын білмей отырмыз», — деді Аманжол Мұсаұлы.
Ақтөбе халықаралық әуежайының директоры Дастан Малиевтің айтуынша, әуежайдан еш кінәрат жоқ.
— Техникалық ақау деп қана айтты. Өзгесін бізге айтпады. Ақпаратты тек FlyArystan компаниясы айтады. Әуежайда бұдан өзге рейс кейінге шегерілмеді, — деді Дастан Малиев.
Kazinform агенттігі FlyArystan әуе компаниясына ресми сауал жолдады. Компания техникалық ақау шыққанын растады.
— 2025 жылдың 17 ақпанында орындалуы тиіс Ақтөбе — Астана бағытындағы FS7394 рейсі техникалық себептерге байланысты кешіктірілді. Жолаушыларға сусындар, тамақ және қонақүйде орналастыру ұсынылды. Сондай-ақ, жолаушыларға ең жақын рейске тегін қайта брондау немесе төлемді толық қайтару мүмкіндігі қолжетімді. FlyArystan келтірілген қолайсыздықтар үшін шынайы кешірім сұрайды және жолаушылардың қауіпсіздігі — әуекомпаниямыздың басты басымдығы екенін еске салады. Қазіргі уақытта мәселені тезірек шешу үшін барлық тиісті шаралар орындалуда. FlyArystan жолаушыларға хабарламаларды What’sApp, SMS немесе билет брондау кезінде көрсетілген электрондық пошта арқылы жеткізеді, — деп хабарлады FlyArystan әуе компаниясының баспасөз қызметі.
Айта кетейік, Ақтау маңындағы ұшақ апаты бойынша тергеудің есебі жарияланды.
