«Теңіз» кенішіндегі вахталық қалашыққа 6,5 мыңнан астам адам эвакуацияланды
АТЫРАУ. KAZINFORM – Атырау облысындағы Құлсары қаласынан екі күнде «Теңіз» кен орнындағы вахталық қалашыққа 6,5 мыңнан асқан адам эвакуацияланды.
Құлсары қаласының тұрғындары «Теңіздегі» қалашыққа күн сайын эвакуацияланып жатыр. Олардың басым көпшілігі – балалы әйелдер мен қарттар.
Тұрғындар ыстық тамақ, медициналық көмекпен қамтамасыз етілген. Балаларға ойыншықтар мен бояулар таратылған.
«Біз өзімізді үйдегідей сезініп жүрміз. Асханадағы тамақ дәмі ұнады. Мейрамханадағы тамақтарды таңдауға болады. Балалар далада ойнауға шықса, оларды қалашықтың күзет қызметкерлері қадағалайды», -дейді Мақпал Шахарбаева.
Оның айтуынша, тұрғындар түнгі мезгілде «Теңіздегі» қалашыққа эвакуацияланған.
Ал, әлеуметтік желіде күзетшінің кішкентай баланың артынан жүгіріп бара жатқаны түсірілген сурет тарады. Желі қолданушылары суретке байланысты жылы пікір білдіріп жатыр.
Еске сала кетелік, бұдан бұрын Атыраудағы Құлсары қаласынан 12 мыңнан астам адам эвакуацияланды.
Сондай-ақ, Атырау облысында эвакуациялау үшін 15 мың орын дайындалғанын жазған едік.
Тасқын су қаупі Құлсары қаласының 7 шағын ауданына төніп тұрғанын хабарлаған болатынбыз.
