ТМҰ елдері қорғаныс өнеркәсібі саласында тұрақты байланыс орнатып жатыр — сарапшы
АСТАНА. KAZINFORM — ҚР Президенті жанындағы Қазақстан стратегиялық зерттеулер институты Халықаралық қауіпсіздік бөлімінің сарапшысы, саяси ғылымдар кандидаты Айнұр Тұқымова Габала декларациясына қатысты пікір білдірді.
— Габала декларациясы ТМҰ-ға мүше мемлекеттердің егемендік пен аумақтық тұтастық қағидаттарына адалдығын, сондай-ақ аймақтық өзекті сын-қатерлер бойынша тұрақты консультациялар өткізудің қажеттілігін растайды. Құжатта ТМҰ үйлестірілген сыртқы саясат ұстанымын күшейтуді мақсат ететіні айқын көрініс тапқан. Сыртқы істер министрлері жиі кездесіп, ал жетекші сараптамалық орталықтар мен университеттер жаңа Түркі стратегиялық болжау желісі аясында күш біріктірмек, — деді сарапшы.
Сондай-ақ спикер декларацияда Ауғанстандағы жағдайға ерекше назар аударылғанын, ондағы қауіпсіздікті қамтамасыз ету бүкіл түркі дүниесінің бейбітшілігі мен өркендеуі үшін шешуші мәнге ие екенін атап өтті.
— Ұйымға мүше елдер стратегиялық әріптестік, мәңгі достық және бауырластық туралы шарт бойынша жұмысты жеделдетіп, қорғаныс өнеркәсібі саласында тұрақты байланыстар орнатып жатыр. Экономикалық бағытта негізгі шешімдерге қызметтер мен инвестициялар саудасын жеңілдету туралы келіссөздердің басталуы, ТМҰ Орталық банктер кеңесін институционализациялау және Түркі инвестициялық қорының өкілеттігін кеңейту жатады. Климаттық әріптестік, тұрақты қаржыландыру және жасыл технологияларды енгізу бағытында да нақты қадамдар бекітілді. Аймақтың энергия жүйелерін еуропалық нарықтармен байланыстыратын өңірлік «жасыл» энергетикалық дәліз құруға ерекше көңіл бөлінді, — деді Айнұр Тұқымова.
Ол сондай-ақ декларацияда Транскаспий халықаралық көлік дәлізіне ерекше мән берілгенін атап өтті.
— Мемлекеттер цифрлық интеграцияны, ережелерді біріздендіруді және логистиканы дамытуды аймақтың транзиттік бәсекеге қабілеттілігін арттырудың негізгі шарты ретінде атап өтті. Зәңгезур дәлізі мен Баку–Тбилиси–Карс теміржолын дамыту, сондай-ақ Қытай–Қырғызстан–Өзбекстан магистралін ілгерілету жобаларына қолдау білдірілді, — деп түйді сөзін сарапшы.
Айта кетейік, бұған дейін Түркі мемлекеттері ұйымы ХІІ саммитінде Габала декларациясына қол қойылғанын жазған едік.
