Трамп Путиннің әскери әрекеттерді тоқтату туралы айтқанына қатысты пікір білдірді

АСТАНА.KAZINFORM —  НАТО Бас хатшысы Марк Рюттемен кездесу барысында Дональд Трамп Ресей президенті Владимир Путиннің ықтимал бітімге қатысты «өте үміт күттіретін мәлімдеме» жасағанын айтты, деп хабарлайды «Америка дауысы».

АҚШ президенті Дональд Трамп бейсенбі күні Ресей президенті Владимир Путиннің Ресей мен Украина арасындағы әскери қимылдарды тоқтату туралы «өте үміт күттіретін мәлімдеме» жасағанын, бірақ оның «толық емес» екенін мәлімдеді.

— Мен онымен кездескім немесе сөйлескім келеді (телефон арқылы). Бірақ біз бұл мәселені тез арада шешуіміз керек, — деді Дональд Трамп Ақ үйде НАТО Бас хатшысы Марк Рюттені қабылдау барысында.

Мәскеуде өтіп жатқан консультацияларға тоқталған АҚШ президенті олардың барысында «қорытынды келісімнің көптеген егжей-тегжейі» талқыланғанын атап өтті.

Бұған дейін Ресей президенті Владимир Путин әскери қимылдарды тоқтату шарттары туралы пікір білдірген болатын.

АҚШ президентінің Таяу Шығыстағы арнайы өкілі Стив Уиткофф Ресей басшылығымен келіссөздер жүргізу үшін Мәскеуге барды.