Түлектердің қауіпсіздігін қамтамасыз ету мақсатында кезекшілік ұйымдастырылды - ҚР БҒМ

АСТАНА. 25 мамыр. ҚазАқпарат - Бүгін Астанадағы Оқушылар сарайында ҚР Білім және ғылым министрі Бақытжан Жұмағұловтың қатысуымен елорда мектептерінің дарынды балалары - 2012-2013 оқу жылындағы республикалық және халықаралық олимпиадалар мен ғылыми жобалар жарыстарының жүлдегерлері мен жеңімпаздары үшін «Триумф» балы өтеді.

Бұл туралы аталған ведомствоның мәліметінде хабарланды.

Атап айтқанда, 2013 жылы жалпы білім беретін мектептерді тәмамдайтын 11-сынып түлектерінің саны 143 мыңнан астам. Ұлттық бірыңғай тестілеуге қатысу үшін 99 815 түлек өтініштерін берді (2012 ж. - 117 333). 2012-2013 оқу жылының қорытындысы бойынша «Алтын белгi» белгісіне үміткер 4678 түлек бар (2012 ж. - 5840).

Бүгінгі күні республика мектептерінде салтанатты жиындар, мерекелік концерттер, жалпы мектепішілік мерекелер, «Ағаш отырғызу» акциялары, ашық есік күні, мектеп бітірушілер кештері өткізіледі. Мектеп мерекелеріне педагогикалық еңбек ардагерлері, ата-аналар, демеушілер, қоғамдық ұйымдар өкілдері шақырылды.

Түлектердің өмірі мен денсаулығының қауіпсіздігін қамтамасыз ету мақсатында педагогтар мен ата-аналар қоғамы, құқық қорғау органдары, өртке қарсы қызмет өкілдерінің қатысуымен кезекшілік ұйымдастырылды.