Түркия Ердоғанның әскери өкілеттігін кеңейтуі мүмкін
АСТАНА.KAZINFORM — Түркияның Ұлттық жиналысында президент Режеп Тайып Ердоғанның әскери саладағы өкілеттігін кеңейтетін заң жобасы қаралып жатыр, деп хабарлайды Kazinform тілшісі.
Биліктегі Әділет және даму партиясының (AKP) депутаттары Ұлттық Мәжіліске ұсынған құжатында жоғары әскери қолбасшылардың қызмет мерзімін 72 жасқа дейін ұзарту мүмкіндігі қарастырылған.
Заң қабылданса, мемлекет басшысы Түркия Құрлық, Әуе және Әскери-теңіз күштері қолбасшыларының өкілеттігін жеке өзі ұзарта алады. Осыған ұқсас ерекшелік бұрын Қарулы Күштер Бас штабының бастығына да жасалған болатын.
Sözcü газетінің хабарлауынша, ұсынылған жаңашылдық жасы бұрын белгіленген зейнеткерлікке шығу шегіне жақындап қалған қазіргі командирлерге тікелей әсер етуі мүмкін.
Белгілі болғандай, түрік армиясының кейбір жетекшілері 64 жастан асқан:
* Құрлық әскерлерінің қолбасшысы Селчук Байрактароғлы– 64 жаста;
* Әскери-әуе күштерінің бастығы Зия Джемал Кадыоғлы — 64 жаста;
* Әскери-теңіз күштерінің басшысы Эрджюмент Татлыоғлы — 65 жаста.
Заң жобасында көрсетілген тағы бір маңызды түзету — қызметте жоғарылату шарттарын өзгерту. Атап айтқанда, корпус генералы немесе вице-адмиралы атағын беру үшін бұдан былай әскери академияның түлегі болу және «курмай» (штаб офицері) мәртебесін иелену қажет емес.
Осы тұрғыда сарапшылар мұндай бастамалардың Түрік қарулы күштеріндегі кадрлық құрылымды айтарлықтай өзгертіп, атқарушы биліктің жоғарғы әскери басшылыққа ықпалын арттыра алатынын атап өтті.
Жалпы, Түркия армиясы президенттің әскери саладағы өкілеттігін кеңейтетін заңнамалық бастамалар аясында нығаюда. Сонымен қатар, Түрік Қарулы Күштері тек жеке құраммен ғана емес, сонымен қатар қару-жарақ жағынан да нығайып, НАТО-дағы ұстанымдарын күшейтіп жатыр. Заманауи техника сатып алу және одақтас оқу-жаттығуларға белсенді қатысу түрік армиясының жауынгерлік әзірлігін арттыруға және альянспен стратегиялық ынтымақтастықты нығайтуға мүмкіндік береді.
Еске сала кетейік, бұған дейін Түркия президенті Режеп Тайып Ердоғанның 2026 жылы НАТО мемлекет және үкімет басшыларының саммиті Анкара қаласында ұйымдастырылатынын айтқан еді.
