Түркияның басқарушы партиясы елде мерзімінен бұрын президент сайлауын өткізуді қарастырып жатыр

АСТАНА.KAZINFORM - Түркияның Әділет және даму партиясы 2027 жылдың күзінде кезектен тыс президент сайлауы өтуі мүмкін екенін жоққа шығармады, деп жазады Kazinform агенттігінің тілшісі.

Қолданыстағы заңнамаға сәйкес, Түркиядағы келесі президент сайлауы 2028 жылы өтуі керек. Алайда, саяси аренадағы жағдай мен ішкі факторлар оны қайта қарауға ықпал етуі мүмкін.

Кезектен тыс сайлау процесі Түркияның Ұлттық Мәжілісінде (ҰҰМ – ел парламенті) шешім қабылдауды талап етеді. Осылайша, Ердоғанның тағы да президенттікке кандидат болуы үшін парламенттік көпшіліктің 360 дауысын бекіту қажет.

Саясаттанушылар мерзімінен бұрын сайлау өткізу саяси тұрақтылықты нығайту және елдегі өзгеріп жатқан саяси ахуал жағдайында азаматтардың партияны қолдайтынын растау үшін маңызды қадам болуы мүмкін дейді. Осы тұрғыда билік партиясы жағдайды бақылап, Түркиядағы ұзақ мерзімді тұрақтылықты қамтамасыз ете алатын шешім қабылдамақшы.

23 ақпанда АК партиясының 8-ші съезі өтіп, онда Ердоған саяси бірлестіктің төрағасы болып қайта сайланды. Ол барлық 1547 дауыс жинап, съезд делегаттарының бірауыздан қолдауына ие болды, бұл оның партиядағы абсолютті көшбасшылығын растайды.

Сарапшылардың пікірінше, бұл таңдау таңқаларлық емес, өйткені Ердоған ұзақ уақыт бойы партия көшбасшысы ғана емес, Түркия саясатындағы басты тұлғасы болып келеді. Оның кандидатурасы партиядағы салыстырмалы саяси тұрақтылық пен оның елдегі ұстанымының нығаюы аясында ұсынылды.

Ердоғанды делегаттардың қолдауы партияның алдағы жылдардағы бағытына, соның ішінде кезектен тыс сайлау мен негізгі саяси тағайындаулар мәселелеріне әсер етуі мүмкін. Сонымен қатар, съезд ішкі және сыртқы саясат мәселелерін, сондай-ақ елдегі алдағы саяси үдерістердегі партияның болашақ рөлін талқылады.

Бұған дейін біз Ердоғанның президент сайлауына қайтадан үміткер болуы мүмкін екенін жазғанбыз.