Ұлттық банк басшысы қазақстандықтарды криптовалютаға инвестиция салуға шақырды

АЛМАТЫ. KAZINFORM – ҚР Ұлттық банк төрағасы Тимур Сүлейменов елімізде криптовалютаны қай жағынан дамытуға болатынын айтты.

Тимур Сүлейменов қаржыгерлердің XII конгресі барысында «Астана» халықаралық қаржы орталығының инфрақұрылымы аясында криптобиржалардың жекелеген түрлерін заңдастыру мәселесі сонау 2022 жылы талқыланғанын атап өтті.

Осыған қарамастан, Қазақстанда криптовалюта нарығының дамуы әлі де шектеулі болып отыр.

Сонымен бірге ол Қырғызстан мен Өзбекстан сияқты елдердің криптовалюталарды реттеуде айтарлықтай жетістіктерге жеткенін және сауда көлемі бойынша қазірдің өзінде Қазақстаннан алда екенін тілге тиек етті.

«Менің ойымша, біз юрисдикция шеңберінде қорғалған цифрлық активтерді бақыланатын түрде шығаруға және айналымына мүмкіндік беруіміз керек. Осыған жеттік деп ойлаймын», - деді Тимур Сүлейменов.

Ұлттық банк басшысы қазақстандықтардың криптовалютаға белсенді түрде инвестиция салып жатқанын ерекше атап өтті

«Олардың бар екендігі шындық. Біз реттеуші ретінде оларды мойындағымыз келмей, есігімізді жауып отыра беруіміз олардың жоғалып кетуін білдірмейді. Бұл қазақстандықтардың және нақты адамдардың активтері ол жерге салынбайды деген сөз емес. Мен мұнда үлкен көлемдегі активтердің инвестицияланып жатқанына сенімдімін. Оның үстіне активтер доллар түрінде. Олар инвестиция салады. Біз мұны көрмейміз. Тыйым салуға болмайды, керісінше, бар болса, рұқсат етейік. Соның ішінде крипто алмастырғыштар сияқты дүние бар. Бұл реттелетін саладан мүлдем тыс емес, белгілі бір реттеу және есеп беру арқылы біздің құқықтық жүйеміздің аясында заңды түрде шешілсе, жақсы болар еді», - деп атап көрсетті Тимур Сүлейменов.

Осы мәселе бойынша Ұлттық банктің ұстанымы либералды.

«Сондықтан алдағы уақытта криптовалюта активтерін және айырбастау операцияларын заңдастыру мәселесі тек дәстүрлі қаржы құрылымдарымен ғана емес, сонымен қатар финтех және криптоиндустрия саласындағы жаңа ойыншылармен де талқыланатын болады»,- деді ол.

Бұған дейін хабарланғандай, қаржы ұйымдарының активтері 65 трлн теңгеге ұлғайды.