Үндістан премьері қашықтан жұмыс істеуге қайта оралуды ұсынды
АСТАНА. KAZINFORM – Үндістан премьер-министрі Нарендра Моди Таяу Шығыстағы дағдарыстың салдарына байланысты ел азаматтарын пандемия кезіндегі тәжірибеге қайта оралуға шақырды. Бұл туралы ТАСС агенттігі хабарлады.
Нарендра Моди Хайдарабад қаласында сөйлеген сөзінде коронавирус пандемиясы кезінде қолданылған қашықтан жұмыс істеу, виртуалды кездесулер мен бейнеконференциялар тәжірибесін қайта енгізу қажеттігін айтты.
– Коронавирус кезінде біз үйден жұмыс істедік, виртуалды кездесулер мен бейнеконференциялар өткіздік. Біз бұған үйреніп қалдық. Қазіргі уақыт талабы – осы тәсілдерге қайта оралу, – деді Нарендра Моди.
Үндістан премьері шетел валютасын үнемдеу мен импорттық энергия ресурстарына тәуелділікті азайтудың маңызын атап өтті. Оның айтуынша, ел азаматтары тұтыну дағдыларын қайта қарауы тиіс.
– Орта тап арасында шетелде той өткізу, шетелге саяхаттау және демалыс ұйымдастыру кең таралып барады. Осы дағдарыс кезеңінде кем дегенде бір жылға шетел сапарларын кейінге қалдыру туралы шешім қабылдауымыз керек, – деді ол.
Сонымен қатар Нарендра Моди азаматтарды мерекелер кезінде бір жыл бойы алтын сатып алудан бас тартуға шақырды.
Үкімет басшысы жанармайды үнемдеп пайдаланудың да маңызды екенін айтты.
– Қазір бензин, дизель және газды барынша үнемдеп пайдалану қажет. Біз бұл энергия ресурстарын шетелден импорттаймыз, сондықтан тек қажетті көлемде ғана тұтынуға тырысуымыз керек, – деді Нарендра Моди.
Осыған байланысты премьер-министр халықты қоғамдық көлік пен теміржолды көбірек пайдалануға үндеді.
– Метро бар жерде метромен жүріңіздер, бір бағытта жүретіндер көлікті бірге пайдалансын, ал жүк тасымалында теміржолды қолданыңыздар. Мұның бәрі бензин мен дизельге тәуелділікті азайтады, демек шетел валютасына тәуелділік те төмендейді, – деді ол.
Айта кетейік, бұған дейін Иранның АҚШ-тың соғысты тоқтату туралы ұсыныстарына қалай жауап бергені хабарланған еді.
