Үйінде автомат сақтаған Түркістан облысының тұрғыны қамауға алынды

қару
Фото: Түркістан облысы ПД

ТҮРКІСТАН. KAZINFORM – Түркістан облысының полицейлері заңсыз сақталған қаруларды тәркіледі. Оның ішінде АК-47 автоматы бар. Бұл туралы Түркістан облысы полиция департаменті бастығының орынбасары Құрманбек Сахов мәлімдеді. 

Төрт жергілікті тұрғынды тінту барысында олардан АК-47 автоматы, 3 мылтық карабині, 2 аңшылық мылтық, травматикалық тапанша, түрлі калибрлі патрондар мен жабайы арқар мүйізі және басқа да заттай дәлелдемелер табылып, тәркіленді.

мылтық
Фото: Түркістан облысы ПД

Қазіргі таңда күдіктілерге қатысты қаруды заңсыз сақтау фактісі бойынша қылмыстық іс қозғалды. Сараптама да тағайындалған.

«Түркістан облысы полиция департаментінің ұйымдасқан қылмысқа қарсы күрес басқармасының қызметкерлері жедел-іздестіру шаралары нәтижесінде қаруды заңсыз сақтау фактілерін анықтады. Аталған іс бойынша Сайрам, Түлкібас және Бәйдібек аудандарының тұрғындары қамауға алынды. Оқиғаның мән-жайы мен күдіктілердің қару-жарақ пен оқ-дәрілерді қандай мақсатта сақтағаны анықталуда. Тергеу жүріп жатыр», - деді Құрманбек Сахов. 

Соңғы жаңалықтар