Вегетация кезеңінде «Қазсушар» филиалдары 524 жаңа техника алды

АСТАНА. KAZINFORM — Вегетация кезеңінің тұрақты өтуін қамтамасыз ету үшін «Қазсушар» филиалдарына 524 жаңа арнайы техника тапсырылды, деп хабарлайды Су ресурстары және ирригация министрлігі.

Су ресурстары және ирригация министрлігі еліміз бойынша «Қазсушар» РМК филиалдарын жаңа арнайы техникалармен қамту жұмысын жалғастырып жатыр. Бүгінге дейін кәсіпорын филиалдары 524 автокөлік пен құрал-жабдық алды.

Жаңа техникалар суару каналдарын механикалық тазалауға және гидротехникалық құрылыстарды жөндеуге пайдаланыла бастады. Жалпы алғанда «Қазсушар» филиалдарына барлығы 757 автокөлік мен құрал-жабдық беру жоспарланып отыр.

Министрлік ұсынған техникалар қатарында экскаваторлар, тиегіштер, шынжыр табанды экскаваторлар, тракторлар, тіркемелер, самосвалдар, тартқыш көліктер, автокрандар, жанармай тасымалдағыштар, қосалқы құрал-жабдықтар мен дизельді генераторлар бар.

— Жаңа техникалар вегетация кезеңінің тұрақты өтуіне жағдай жасау үшін, соның ішінде каналдардың өткізу мүмкіндігін арттыру мақсатында оларды тазалау жұмыстарына қолданылып жатыр. Қазір «Қазсушар» филиалдары жалпы ұзындығы 2 011 шақырым суару каналдарында механикалық тазалау жұмыстарын жүргізіп жатыр, оның 780 шақырымында жұмыстар аяқталды, — деді Су ресурстары және ирригация вице-министрі Ерболат Ибрайханов.

Бұдан бұрын Су ресурстары министрлігі суды ортақ пайдаланудың ережелерін бекітті.