Венециялықтар гондольерлердің азайып бара жатқанына алаңдаулы

АСТАНА. KAZINFORM – Италиялық Венецияда ата жолын қуған қайықшылар саны азайып келеді.

Гондолаларды басқару үшін адам жалдау уақыт өткен сайын қиынға соғып келеді. Гондол лицензиялары көбінесе мұраға қалдырылады.

Болашақ қайықшылар италия тілін білуі, дені сау болуы, жүзе білуі, алғашқы медициналық көмек көрсете алуы және Венеция тарихын білуі керек. Оны оқу мың еуро тұрады және алты айға созылады, бірақ тез ақталады.

Жарты сағат қайықпен саяхаттау үшін туристер кешкі сағат жетіден кейін шамамен 80 еуро төлейді. Кейде тіпті 100 еуроға дейін көтеріледі. Ән айту немесе музыкалық аспапта ойнау арқылы гондольер одан да көп ақша таба алады.

-Алайда, алдыңғы буын зейнеткерлікке шығып, орнын алмастыратындар тапшы болып отыр, - деді Венеция гондолерлер қауымдастығының президенті Андреа Бальби шетелдік БАҚ-қа берген сұхбатында.

Бір кездері Венецияда мыңдаған гондольерлер қауымдастығы болды, оларды әдеттегі киімдерінде - жолақты жейде мен сабан қалпақпен көруге болатын және олар қайықты бір ескекпен басқаратын. Ал бүгінде олардың саны 450-ден аз.