Жамбыл облысында жасөспірім төбелестен кейін көзінен айрылды

АСТАНА.KAZINFORM - Таразда 15 жастағы мектеп оқушысын қатыгездікпен ұрып-соғу оқиғасы бойынша тергеу жүргізіліп жатыр. Жасөспірім топтық шабуыл салдарынан ауыр жарақат алды.

Қайғылы оқиға киім ауыстыратын бөлмеде болған. Оны бірнеше бала қатыгездікпен соққыға жығып, көмекке келуге тырысқан басқа жасөспірімдердің бөлмеге кіруіне жол бермеген. Оқиғаның мән-жайы, сондай-ақ төбелестің кейбір көріністері мектепте орнатылған бейнебақылау камераларына түсірілген.

Зардап шеккен оқушы бірнеше жарақатпен ауруханаға жеткізілді. Дәрігерлер оның зақымданған көзін сақтап қала алмады.

Полиция Қазақстан Республикасы Қылмыстық кодексінің -Қасақана ауыр дене жарақатын салу» бабы бойынша сотқа дейінгі тергеуді бастады. Тек бір күдікті ұсталып, уақытша ұстау изоляторына қамалды. Жасөспірімді ұрып-соққан өзге адамдардың әлі күнге дейін ұсталмағаны туралы сұрақ ашық күйінде қалып отыр.

-Тергеу нәтижелері бойынша оқиғаға қатысушылардың барлығының әрекеттеріне құқықтық баға беріледі. Қазіргі уақытта оқиғаның мән-жайын толық және объективті түрде анықтау үшін қажетті тергеу іс-шаралары жүргізіліп жатыр, - деп хабарлады департамент.

Сонымен қатар, полиция шабуыл жасаған мектеп оқушыларының ата-аналары да кәмелетке толмағандарды тәрбиелеу және олардың қауіпсіздігін қамтамасыз ету жөніндегі міндеттерін орындамағаны үшін жауап беретінін атап өтті.

Жамбыл облысында енесінің атына несие рәсімдеген келін сотталды.