Жаңа терминалдың төбесінен су ақты. Алматы әуежайы жағдайды түсіндірді

АСТАНА. KAZINFORM — Әлеуметтік желілерде Алматының жаңа халықаралық терминал ғимараттарының бірінде су ағып жатқаны бейнеленген видео таратылуда.

Алматы халықаралық әуежайы осы видеоға қатысты түсініктеме берді. Мердігер ұйым 1-терминал мен 2-терминал арасын сумен жабдықтау үшін резервтік құбыр орнату жұмыстарын жүргізді.

— 23 ақпанда жүйені сынақтан өткізу кезінде құбырлардың жалғасқан жері ажырап кетіп, салдарынан 2-терминалдың күту залына су ағып кетті. Жағдай жедел түрде бақылауға алынды және оқиғаның салдары қысқа мерзім ішінде жойылды. Бұл оқиға әуежайдың жұмысына әсер етпеді және жолаушылар мен қызметкерлердің қауіпсіздігіне қауіп төндірмеді. Келтірілген қолайсыздықтар үшін кешірім сұраймыз және түсіністік танытқаныңыз үшін алғыс айтамыз, — деп атап өтті әуежайдың корпоративтік коммуникациялар департаменті.

Еске салсақ, бұған дейін Алматы әуежайының ескі және жаңа терминалы арасында көпір ашылғанын жазғанбыз. Бұған дейін екі терминал арасында тікелей байланыс болмаған еді. Ескі не жаңа терминалдан екіншісіне бару үшін ғимараттың сыртына шығып, жаяу жүру қажет болатын.

Сонымен қатар, Алматы әуежайында жануарларға арналған аймақ ашылғаны да айтылды.