Жаңадан құрылған Халықаралық бокс федерациясы туралы не білеміз
АСТАНА. KAZINFORM — Қазақстан ұлттық олимпиада комитетінің президенті Геннадий Головкиннің Халықаралық бокс федерациясы (World Boxing) жаңа Олимпиада комиссиясының төрағасы болып тағайындалуы спорт әлемінің басты жаңалығы болды. Осы орайда жаңадан құрылған Халықаралық бокс федерациясы туралы айта кеткенді жөн көрдік.
World Boxing — Халықаралық бокс федерациясы 2023 жылдың сәуірінде құрылып, сол жылы қараша айында өз жұмысын бастады. Франкфуртта (Германия) өткен алғашқы конгресте ұйымның басшылығы және комитеттері анықталып, жарғысы бекітілді.
Қазіргі таңда ұйым құрамына әлемнің 44 елінің бокс федерациясы мүше.
Ұйымның алғашқы президенті болып нидерландтық Борис ван дер Ворс тағайындалса, Райан О’Ши (Канада), Мэтт Холт (Англия) және Дина Гликидис (Австралия) орынбасары болды.
Ұйымының штаб-пәтері Швейцарияның Лозанна қаласында орналасқан.
Басты мақсаты — боксты олимпиада бағдарламасында сақтап қалу
Ұйымның құрылуының басты себебі — боксты олимпиадалық спорт түрі ретінде сақтап қалу. 2019 жылдың шілдесінде Халықаралық олимпиада комитеті (ХОК) көптеген сыбайлас жемқорлық дауларына байланысты Халықаралық бокс қауымдастығымен (International Boxing Association, IBA) жұмысын тоқтатты.
Сондай-ақ, Халықаралық олимпиада комитеті арнайы жұмыс тобын құрып, 2020 жылғы және 2024 жылғы олимпиада ойындарына қатысатын боксшыларды тек комитет мойындалған турнирлер арқылы іріктеді.
2022 жылдың қазан айында Халықаралық бокс қауымдастығы Ресей-Украина соғысына байланысты Халықаралық олимпиада комитетінің Ресей мен Беларусь боксшыларына салған шектеуге құлақ аспай, көптеген елдердің бокс қауымдастығының бойкот жариялауына себеп болды.
2023 жылдың маусымында Халықаралық олимпиада комитеті Халықаралық бокс қауымдастығын олимпиада ойындарынан ресми түрде шығарды. Дауыс беру нәтижесінде 69 ел қолдап дауыс берсе, 1 ел қарсы және 10 ел қалыс қалған.
Қорытындысында АҚШ, Ұлыбритания, Германия, Нидерланд, Швеция, Филиппин және басқа елдердің бокс қауымдастықтары ХБА-дан шығып, бокс спортының 2028 жылғы Лос-Анжелес олимпиадасынан тыс қалмауы үшін Халықаралық бокс федерациясы (World Boxing) құрылды.
ХОК 2028 жылы Лос-Анжелесте өтетін жазғы олимпиаданың бокс жарысын арнайы жұмыс тобы өткізбейтінін жариялап, олимпиада ойындарының бағдарламасына әзірге бокс спортын қосқан жоқ.
Жаңа құрылған Халықаралық бокс федерациясы 2025 жылға дейін Халықаралық олимпиада комитетінің мүшесі атанып, 2028 жылғы олимпиада ойындарында бокс спортын сақтап қалуды жоспарлап отыр.
Қазақстан бокс спортына әсері
World Boxing ұйымының құрылуы Қазақстан бокс спортының дамуы үшін жаңа мүмкіндіктер туғызып отыр. Бұған дейін Қазақстан боксшыларының IBA құрамындағы жекпе-жегі көптеген дау-дамайға қалған еді. Оған ең жарқын мысал ретінде 2016 жылғы Рио олимпиадасындағы Левит-Тищенко кездесуін айтуға болады.
Бұл күнде Қазақстан ұлттық олимпиада комитеті басшысы қызыметін атқарып отырған, әлемге әйгілі кәсіпқой бокстан әлем чемпионы, Афина олимпиадасының күміс жүлдегері Геннадий Головкин осы жылы шілденің басында Қазақстанды және басқа елдерді жаңа ұйымға қосылуға шақырған.
Ал бүгін ғана ұйымның Олимпиада комиссиясының төрағасы болып тағайындалған Головкин боксты олимпиадалық спорт түрі ретінде сақтап қалу — жұмысындағы ең басты басымдық екенін айтты.
Сондай-ақ, Қазақстан бокс федерациясы іле-шала World Boxing ұйымының қатарына қосылу үшін ресми өтініш бергенін хабарлады.
ҚР Бокс федерациясы бұл ұзақ талқылаулар мен сараптаманың нәтижесінде қабылданған маңызды шешім екенін және бірінші кезекте отандық боксшылардың олимпиадалық болашағына тікелей байланысты екенін атап өтті.
«Қазір бокстың Олимпиада бағдарламасында қалу мәселесі ХОК деңгейінде талқыланып жатыр. Боксты Олимпиада ойындарының бағдарламасында сақтап қалу мақсатында барлық елдермен ортақ жұмыс жасауға дайынбыз. Бұл шешім боксты одан әрі дамытуға мүмкіндік береді деп санаймыз. World Boxing Олимпиадалық Комиссиясының төрағасы, Ұлттық Олимпиада комитетінің президенті Геннадий Головкинмен кездесу барысында Отандық бокстың даму жолдарын талқыладық», — дейді федерация басшысы Шахмұрат Мүтәліп.
Айта кетейік, 2024 жылғы Париж олимпиадасында Қазақстан ерлер бокс құрамасы сапында 7 спортшы қатысып, Нұрбек Оралбай ғана күміс медаль еншілеген болатын.
Париж Олимпиадасынан кейін Қазақстан бокс федерациясы қорытынды кеңес өткізіп, нәтижесінде бокстан ерлер командасының бапкерлік құрамы толығымен жұмыстан шеттетілді.
Олардың қатарында бас жаттықтырушы Мырзағали Айтжанов және бапкерлік құрамдағы 10 маман, ҚБФ вице-президенті Азиз Қожамбетов қызметтен босатылған еді.
Қазіргі уақытта ұлттық құраманы Қайрат Сәтжан бастаған жаңа бапкерлік құрам жаттықтырып жатыр.
