Жапонияда туу көрсеткіші ең төмен деңгейге түсті
АСТАНА. KAZINFORM – 2025 жылы Жапония азаматтарында 671 236 бала дүниеге келді, бұл алдыңғы жылмен салыстырғанда 14 937-ге аз. Осылайша, бұл 1899 жылдан бері жүргізіліп отырған бақылаудың бүкіл тарихындағы ең төменгі туу көрсеткіші болды, деп хабарлайды Jiji Press.
Туу көрсеткіші оныншы жыл қатарынан рекордтық төмен деңгейде қалып отыр.
Әйелдің өмір бойы тууы күтілетін балалардың орташа санын өлшейтін жалпы туу көрсеткіші де рекордтық ең төменгі деңгейге төмендеді – 1,14.
Осы арада елде 2025 жылы 1 589 489 өлім тіркелді. Бұл көрсеткіш бес жыл ішінде алғаш рет алдыңғы жылмен салыстырғанда төмен болды. Бұған COVID-19 вирусынан өлім санының азаюы себеп болуы мүмкін.
Бұл ретте өлім саны туғандар санынан 918 253-ке асып түсті. Осылайша, елде 19-шы жыл қатарынан халық санының табиғи түрде азаюы тіркеліп отыр.
Ел үкіметі өткен жылдың қараша айында халық санының азаюына қарсы тұру үшін үйлестіру орталығы ретінде қызмет етуге арналған Демографиялық стратегияны іске асыру штабын құрды.
Олай болғанымен туу деңгейінің төмендеуі Халық саны және әлеуметтік қамсыздандыру зерттеулері ұлттық институты болжағаннан шамамен 15 жылға жылдамырақ болып отыр.
Осыған дейін Жапонияда демографиялық құлдырау 45 жыл қатарынан жалғасып келе жатқанын жаздық.
