Жеңістің 80 жылдығына арналған әскери шеру: Қорғаныс министрлігі мәлімдеме жасады

АСТАНА. KAZINFORM – 13 наурыздан бастап әуе және көлік қатынасына жекелеген учаскелерде уақытша шектеу енгізілуі мүмкін. Бұл туралы Қорғаныс министрлігі хабарлайды.

- Ұлы Отан соғысындағы Жеңістің 80 жылдығына арналған Астана қаласында өтетін әскери парадқа дайындық шараларына байланысты 13 наурыздан бастап жеке құрамды тасымалдау және әскери техниканың теміржол көлігімен де, өз жүрісімен қозғалысы басталады деп жоспарланып отыр, - делінген хабарламада.

Осыған орай еліміздің кейбір аймақтарындағы жолдардың жекелеген учаскелерінде жол қозғалысына уақытша шектеу енгізілуі мүмкін.

- Сондай-ақ 2025 жылғы 22 сәуір мен 7 мамыр аралығында әскери авиацияның жаттығу ұшуларын жүргізу үшін Астана қаласында әуе кеңістігін пайдалануға қысқа мерзімді шектеулер қойылады. Осыған байланысты әуе рейстерінің кестесіне де өзгерістер енгізілуі мүмкін. Біз азаматтарға рейстер туралы ақпаратты алдын ала нақтылауды ұсынамыз, - дейді ведомстводан.

Сонымен қатар министрлік енгізілген шектеулерге түсіністікпен қарауды, жалған ақпарат таратпай, тек ресми дереккөздерге жүгінуді сұрап отыр.

Айта кетейік, биыл Ұлы Жеңіске 80 жыл толады. 

Сондай-ақ биыл Екінші дүниежүзілік соғыс ардагерлеріне Жеңістің 80 жылдығы медалі беріледі.