Жетістікке жеткің келсе, ештеңені ертеңге қалдырма – Михаил Шайдоров
АСТАНА. KAZINFORM — 2025 жылы Бостон қаласында (АҚШ) өткен әлем чемпионатында күміс жүлдеге ие болған қазақстандық мәнерлеп сырғанау спортының шебері Михаил Шайдоров Kazinform тілшісіне эксклюзив сұхбат берді.
— Бостонда өткен әлем чемпионатында күміс медаль алдыңыз. Сол турнирден алған әсеріңіз қандай? Сіз маусым басында жеңіс тұғырынан көрінемін деген мақсат қоймағаныңызды айтқан едіңіз. Мұндай серпіліске қандай жағдай әсер етті?
— Қай кезде де зор табысқа қол созу оңай емес. Ол үшін көп тер төгуге тура келеді. Осы мақсатта көп жұмыс істедім. Көптеген қиындықты артта қалдырдым. Бәрі ойлағанымдай жүзеге асты. Спортта жетістікке жеткең келсе, ештеңені ертеңге қалдыруға болмайды. Жарыс барысында әлемде ешкім жасамаған каскадтарды орындадым. Сол арқылы жетістікке жол ашылды. Бір сөзбен айтқанда, төгілген тердің өтеуі қайтты.
— Әлем біріншілігінде сәтті өнер көрсеткеннен кейін Қазақстан ерлер арасында жекелей сында Олимпиаданың үш жолдамасына ие болды. Жалпы ұлттық құрама ішінде бәсекелестік деңгейін қалай бағалайсыз? Алдағы Олимпиадада қандай мақсат қойып отырсыздар?
— Өзге де спортшылар көп жұмыс істеп, әлемдік деңгейде танылғанын қалаймын. Мәнерлеп сырғанау спортының кең етек жайып, әлі де дами түсетініне сенемін.
— Әлем чемпионатында еркін бағдарлама бойынша көрсеткен өнеріңіз жоғары бағаланды. Турнирге дайындық барысы, музыка таңдау және ең қиын элементтерді орындауға ұмтылыс туралы айта аласыз ба?
— Жетістігіме команда құрамында еңбек еткен барлық азамат зор үлес қосты. Мәселен хореограф Ваня Ригини маған жарыс кезінде қойылатын композицияны ұсынды. Ол маған да ұнады. Біз оны көптеген жарыста ел назарына ұсынып жүрдік. Оны әсіресе Италия, Түркиядағы жарысты тамашалаған жанкүйерлер жақсы біледі. Сондай-ақ мұндай мүмкіндікке қазақстандық спортсүйер қауым да ие болды.
— Сәтті өткен маусымнан кейін көптеген спортшы алдына жаңа мақсат қояды, көрсеткішін одан сайын жақсартқысы келеді. Келесі маусымға алдыңызға қандай мақсат-міндеттер қойдыңыз? Алдағы уақытта қандай жарыстарға қатысуды жоспарлап отырсыз?
— Әрине, алда бізді көп жұмыс күтіп тұр. Мазмұнды қиындату, сырғанау, хореография, жаңа бағдарламалар жасау секілді көптеген түрлі идея бар. Жарақаттан айыққаннан кейін дайындыққа кірісемін. Енді бұл бағытта әлі де көп еңбектене бастаймын. Алға қойған мақсатымды, ойымды жүзеге асырамын деген сенімдемін.
— Хоббиіңіз туралы білгіміз келеді... Мәнерлеп сырғанауда кімді үлгі тұтасыз?
— Жапониялық спортшы Юзуру Ханьюды үлгі тұтамын. Спорттық мансабымда маған қолдау көрсеткен адам аз емес. Олардың арасынан бапкерлерім Алексей Евгеньевич және Иван Ригиниді ерекшелеп атап өткен жөн. Оларға алғысым шексіз. Сондай-ақ отбасыма, хореограф, спорттық дамыту дирекциясы, демеушілерге және түрлі жағдайда маған демеу көрсеткен барлық азаматқа ризашылығымды білдіргім келеді. Теледидар арқылы маған жанкүйерлік еткен тілеулестеріме, аренада туымызды желбіретіп көзге түскен жанкүйерлерге де алғыстан басқа айтарым жоқ. Қысқасы, қуанышты сәтте менімен бірге қуанышқа бөленген жандарға көп рақмет.
