Жетісу облысында жануар қалдықтары табылған қауіпті қоқыс полигоны анықталды
АСТАНА. KAZINFORM – Жетісу облысы Кербұлақ ауданы Көксу ауылдық округіндегі қатты тұрмыстық қалдықтар полигонының санитариялық жағдайына қатысты әлеуметтік желілерде алаңдаушылық тудырған ақпарат тарады.
Мәселе жергілікті тұрғынның бейнеүндеуінен кейін көтерілген. Оның айтуынша, қоқыс полигонында тұрмыстық қалдықтармен бірге ірі қара мал мен басқа да жануарлардың шіріп жатқан қалдықтары анықталған.
Мұндай жағдай санитариялық-эпидемиологиялық қауіпсіздікке елеулі қатер төндіреді.
Сарапшылардың пікірінше, биологиялық қалдықтардың ашық жерде ыдырауы жұқпалы аурулардың таралуына себеп болуы мүмкін. Сонымен қатар полигон аумағына қаңғыбас жануарлар мен жәндіктердің жиналуы инфекциялардың ауа, топырақ және су арқылы таралу қаупін арттырады.
Бұдан бөлек, қоқыс арасында бықсып жану ошақтары тіркелген. Бұл өрт шығу қаупін күшейтіп, атмосфераға зиянды заттардың бөлінуіне әкелуі ықтимал.
Аталған жағдайға Көксу ауылдық округінің әкімдігі түсініктеме берді.
– Қатты тұрмыстық қалдықтарды шығару қызметін мемлекеттік сатып алу қорытындысы бойынша «Сарыөзек Ресайклинг» ЖШС жүзеге асырады. Компаниямен 2026 жылғы 17 наурызда келісімшарт жасалған, – деп мәлімдеді әкімдікте.
Сонымен бірге әкімдік өкілдері қазіргі уақытқа дейін мердігер тарапынан полигонда санитариялық тазалау жұмыстары жүргізілмегенін мойындады. Компанияға тиісті ескерту жолданып, жақын арада тазалау жұмыстары басталатыны айтылды.
Жергілікті билік өкілдері жағдай бақылауда екенін жеткізді.
Айта кетейік, бұған дейін Маңғыстау облысында дала қоқысқа толып кеткені туралы да хабарланған болатын.
