Жұманғарин Қазақстан-Словения экономикалық байланысы жайында: іскерлік кеңес құру жоспарда

АСТАНА. KAZINFORM – Премьер-министрдің орынбасары — Ұлттық экономика министрі Серік Жұманғарин Қазақстан мен Словенияның қарым-қатынасына орай пікір білдірді.

- Жалпы айтқанда қазіргі уақытта мақтанарлық ештеңе жоқ. Себебі біздің тауар айналымымыз өте төмен – 106 млн доллар. Экспортымыздың ішінде фанера және титан бар. Ал импорт – дәрі-дәрмек пен вакциналар. Бірақ, қызметтерді дамыту келешегі бар. Оларда да, бізде де ІТ саласы, жасанды интеллект саласы Еуропаның басқа елдерімен салыстырғанда өте жоғары дамып келеді. Екінші – көлік-логистика. Себебі, Слования Еуропаның кіре берісінде орналасқан. Үшінші – туризм. Минералды өте танымал курорттары бар. Қазақстандықтар өте жақсы көреді, жиі барады, - деді Серік Жұманғарин Ақордада БАҚ өкілдерінің сауалына орай.

Вице-премьердің атап өтуінше, Қазақстан мен Словения қарым-қатынасы жаман емес.

- Жақында үкіметарлық коммисия отырысы жоспарланған, мамырда болады. Сонда шешімін табатын біраз мәселе бар. Біз өз тарапымыздан Қазақстаннан Словенияға экспорттауға болатын әлеуетті тауарлар тізімін бердік. Олар да бізге беріп жатыр. Екі ел арасында іскерлік кеңесін құру жоспарланған, - деді ол.

Айта кетейік, қазіргі уақытта елімізге ресми сапармен келген Словения Президенті Наташа Пирц-Мусар Ақордада Мемлекет басшысы Қасым-Жомарт Тоқаевпен келіссөз өткізіп жатыр.