Қазақстандық Александр Бублик жұптық сында Чэнду (Қытай) ATP 250 турнирінің ширек финалына өтті, деп хабарлайды ҚазАқпарат тілшісі.
Қазақстандық теннисші сербиялық Миомир Кецмановичпен бірге бастапқы кездесуін колумбиялық Даниэль Элахи Галан – Перу өкілі Хуан Пабло Варильяспен сәтті өткізді.
Бірінші партияда Бублик – Кецманович 6:4 есебімен басым түссе, екінші сетте тіпті бет қаратпады – 6:0. Бір сағатқа жуық уақытқа созылған бәсеке барысында олар 1 эйспен бірге 7 брейк-пойнттың төртеуін өз есебіне жазды.
А.Бублик – М.Кецмановичтің ширек финалдағы қарсыластары кейін анықталады.
Қазақстандық теннисші жүлде қоры 1,1 млн АҚШ долларынан асатын жарыста жекелей сында да өнер көрсетеді.
Әлемнің 29-ракеткасы А.Бубликтің алғашқы қарсыласы – дүниежүзілік рейтингте 64-сатыда тұрған америкалық Маркос Гирон.
Еске сала кетейік, бұдан бұрын Юлия Путинцеваның Қытайдағы турнирді жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).