10 елдің қуыршақ театры Астанадағы фестивальда бас қосады
Қазақстанның қуыршақ өнеріндегі бірінші кәсіпқой режиссері, Қазақстан Республикасының еңбек сіңірген артісі, Астана қаласының Мемлекеттік Қуыршақ театрының көркемдік жетекшісі Құралай Ешмұратованың атындағы ІІ «Құралай» қуыршақ театры халықаралық фестиваліне Тунис, Босния және Герцеговина, Бельгия, Италия, Польша, Ресей, Түркия, Эстония, Сербия, Қазақстанның ұжымдары қатысады. Театрлар 1-4 шілдеде елордалық Қуыршақ театрының сахнасында өнер көрсетеді.
Фестиваль Республика даңғылының бойымен «Жастар» сарайынан театрға дейін қатысушылар шеруімен басталады. Қаланың кең көшелерімен ұлттық киім киген балалар мен әртістердің сүйемелдеуімен үрмелі аспаптар оркестрі, бойшаң қуыршақтар, «Зара» шоу-балетінің артістері, ағашаяқ мінгендер шоуы жүріп өтеді. Шеру 1 шілдеде сағат 10:30-да басталады.
Фестиваль бағдарламасының бірінші спектаклі сағат 13.30-да көрсетіледі. Мемлекеттік Алматы қуыршақ театры көрермендер назарына «Қаңбақ шал» халық ертегісін қояды. Екі сағаттан кейін «АДАДЖО» сахналық миниатюрасы көпшілік назарына ұсынылады. Бұл Ресей мемлекеттік сахналық өнер институтының қуыршақ театры факультетінің және «Културна сцена МАЛИ СТВАРИ ТРЕБИНЕ» (Босния және Герцеговина) театрының бірлескен шығармашылық жобасы. Қонақтардың бірі қойылымды тамашаласа, басқалары серб режиссері Амела Вученовичтің «Қуыршақ және бала», «Адамгершілікке тәрбиелеу», «Қуыршақ ойнатушы артістің өнері» шеберлік дәрістеріне қатыса алады. Фестивальдің бірінші күні италиялық «Верди» қуыршақ театрының интерактивті шоуымен аяқталады.
2 шілдеде сағат 10.00-де көрермендер ыстанбұлдық (Түркия) «Қаракөз» қуыршақ театрының орындауындағы «Қоқыс құбыжығы» қойылымын көре алады. Содан кейін санкт-петерборлық Виктор Антонов «Жіптегі цирк» көрсетеді. Сонымен қатар, күндізгі бағдарламаға эстониялық «Projekt» театрының «Умка» қойылымы және «MarekWaszkiel» поляк театрының «Побудка, подьем и сияние» туындысы енгізілді.
3 шілдеде фестиваль Тунис ұлттық қуыршақ өнері орталығының «Кездесу» қойылымымен жалғасады. Бельгиялық «FigurenTheatreVlinders» театры «Кішкентай қара балапан туралы хикаяны» көрсетеді. Тамбов мемлекеттік қуыршақ театры «Жуча» қойылымын ұсынады. Фестиваль елордалық Қуыршақ театрының «Мәңгілік бала бейне» спектаклімен аяқталады. Отандық драматург Роза Мұқанованың еңбегі 1949-1989 жылдары Семей полигонында ядролық сынақтардан зардап шеккен балаларға арналған.
4 шілде күні кешке Астана қуыршақ театрының залында «Құралай» халықаралық фестиваліне қатысушыларды марапаттау және оның салтанатты жабылуы өтеді.