«ҚР Президентінің 2014 жылғы 25 тамыздағы Жарлығын іске асыру мақсатында заң жобасымен Үкіметтің өкілеттігі нақтыланады. Атап айтқанда, бұндай өкілеттік мемлекеттік әлеуметтік-экономикалық негізгі бағыттарды айқындау, мемлекеттің қорғаныс қабілеттілігін, қауіпсіздікті, қоғамдық тәртіпті қамтамасыз ету және оларды жүзеге асыру бөлігін қамтып отыр», - деді министр Е.Досаев.
Министрдің сөзіне қарағанда, Үкімет пен министрліктер құрамына енбеген орталық мемлекеттік органдарға стратегиялық, реттеуші, жүзеге асырушы, бақылау-қадағалау функциялары, стратегиялық жоспарлар мен бағдарламаларды жүзеге асыру өкілеттіктері беріледі. Осыған орай, заң жобасымен 15 кодекске және 125 заңға өзгерістер енгізу көзделеді. «1598 функция Үкіметтен министрліктердің құзырына беріледі. Министрліктердің нормативтік-құқықтық актілер қабылдау және мемлекеттік қызмет стандарттары мен регламенттерін бекіту функциялары кеңейе түседі», - дейді Е. Досаев.
Еске сала кетейік, аталған заң жобасын ҚР Президенті шұғыл деп жариялаған болатын. Құжат бүгін Мәжілістің жалпы отырысында жұмысқа алынған еді.