Бұл туралы бүгін Үкімет отырысында ҚР Инвестициялар және даму министрі Әсет Исекешев мәлім етті.
Оның атап өтуінше, 2015 жылдың қорытындысында 618 шақырым автомобиль жолының құрылысы аяқталып, «Батыс Еуропа - Батыс Қытай» жобасы аясында Шымкент пен Тараз арасында қозғалыс жанданады. «Алматы-Қапшағай», «Астана-Теміртау», «Орталық-Шығыс» жобаларының 9 учаскесі пайдалануға беріледі.
«2016 жылы 9 жобаны жүзеге асыру үшін 240 млрд. теңге бөлу көзделіп отыр. 2016 жылдың қорытындысында «Батыс Еуропа-Батыс Қытай», «Бейнеу-Ақтау», «Астана-Теміртау», «Алматы-Қапшағай-Талдықорған», «Астана-Петропавл» жобаларын толық аяқтау жоспарлануда», - деді Ә.Исекешев.
Министрдің айтуынша, «Қазавтожол» компаниясы Қытайдың Эксимбанкінен қаржы тарту арқылы мемлекеттік-жекешелік серіктестік негізінде «Талдықорған-Өскемен», «Алматы-Қапшағай», «Үшарал-Достық» сынды жобалар жүзеге асырылмақ.
«Бұл жобалардың жалпы ұзақтығы 1,5 мың шақырымды құрайды. Құрылыс жұмыстары 2016 жылы басталады», - деді ол.