3 шілде күні ел аумағында ауа райы қандай болады

НҰР-СҰЛТАН. ҚазАқпарат - Синоптиктер 3 шілде күні Қазақстан аумағында ауа райы қандай болатынын жариялады, деп хабарлайды ҚазАқпарат «Қазгидромет» РМК баспасөз қызметіне сілтеме жасап.

Қазақстан территориясының басым бөлігі антициклон ықпалында болғандықтан, ыстық және кұрғақ ауа райы сақталады.

Тек батыс және солтүстік өңірлерде циклон жырасы және онымен байланысты атмосфералық фронттар өтеді. Салдарынан өткінші жаңбыр және бұршақ жауады, найзағай жарқылдайды.

Республика бойынша кей жерлерде жел күшейеді, оңтүстік-батыста шаңды дауыл соғады.

Батыс Қазақстан, Қостанай облыстарының кей жерлерінде дауыл соғады, бұршақ жауады. Жел қарқыны 15-20 м/с дейін күшейеді.

Қызылорда, Солтүстік Қазақстан облыстарында күндіз кей жерлерде жел екпіні - 15-20 м/с. Қызылорда облысында шаңды дауыл тұрады.

Жамбыл облысында таңертең және күндіз кей жерлерде бұршақ жауады. Жел жылдамдығы 15-20 м/с жетеді.

Күндіз Ақмола, Қызылорда, Қостанай, Қарағанды облыстарында қатты, кей жерлерде өте қатты ыстық сақталады.

Алматы, Жамбыл, Түркістан, Атырау, Ақтөбе, Солтүстік Қазақстан, Павлодар, Шығыс Қазақстан облыстарында, Батыс Қазақстан облысының кей жерлерінде, Маңғыстау облысының оңтүстігінде аптап ыстық болады.

Қызылорда, Түркістан, Маңғыстау облыстарында, Атырау, Ақтөбе, Жамбыл облыстарының басым бөлігінде, Қарағанды, Батыс Қазақстан, Қостанай, Алматы облыстарының кей жерлерінде, Ақмола облысының жекелеген аудандарында өте жоғары өрт қаупі сақталады.