ОРАЛ. KAZINFORM — БҚО бойынша экономикалық тергеп-тексеру департаменті «Батыс су арнасы» ЖШС-мен ауыз суды залалсыздандыруға арналған жабдықтарды жеткізу және орнату бойынша мемлекеттік сатып алуды жүзеге асыру барысында бюджет қаражатын жымқыруға оқталу дерегі бойынша сотқа дейінгі тергеп-тексеруді бастады.
Департаменттің баспасөз қызметінен мәлім еткеніндей, сот-тауартану сараптамасының нәтижелеріне сәйкес жабдық құнының нарықтық бағадан жоғарылату сомасы 421 млн теңге болды.
- Қазіргі уақытта сотқа дейінгі тергеп-тексеру жүргізілуде. Лауазымды тұлғаларды ұстап алу жүргізілмеді. Сондай-ақ аталған сотқа дейінгі тергеп-тексеру «Батыс су арнасы» ЖШС-нің негізгі қызметіне, оның ішінде жұмыскерлердің жалақысын кешіктіруге әсер етпейді. ҚР Қылмыстық-процестік кодексінің 201-бабының талаптарына сәйкес өзге ақпарат тергеу мүддесінде жария етуге жатпайды, - деп хабарлады ведомстводан.
Еске сала кетейік, бұдан бұрын Оралда 155 млн теңгелік мемлекеттік сатып алу кезінде жалған банк кепілдік құжаты анықталғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).