43 метр биіктіктен секіріп жүрген астаналықтар бар

АСТАНА. ҚазАқпарат - Әр демалыс сайын «FLY Rope Jumping Астана» шарасын ұйымдастырушылар құрылысы аяқталмаған астық қоймасының шатырынан (43 метр) секіруді ұйымдастырып келеді. Бұл жолы «ҚазАқпарат» тілшісі «қалықтаушылардың» әрекеттеріне куә болып қайтты.

Басын тігіп, биіктен «құлағысы» келгендер әуелі 4000 теңге төлеуі шарт. «Ал, қауіпсіздік шаралары ескерілген бұл секіру түрінің адам денсаулығына зияны жоқ», дейді ұйымдастырушылар. Алайда, олар арнайы сұхбат беруден бас тартып, одан да тілшілердің өздері куә болуы керектігін айтты.

Жәй ғана куә болғысы келген адам да ғимарат шатырына көтерілуі үшін денсаулығының жақсы екенін растайтын құжаттарға қол қоюы керек. Өкініштісі, түсіруші-операторымыз шатырдан секіруге батпады.

Ұйымдастырушылар арқанның мықтылығын айтып, онымен көлік те сүйреуге болатынын жеткізді.

«Қалқыған кезде адамның ішкі органдарына зақым келмейді. Бірақ, секіру траекториясын сақтаған жөн», дейді секірушілер.

Қазақстанда спорттың осындай түрі тіркелмеген, бірақ оған тыйым да салынбаған. Ол сайыс түрінде өткізілмейді, өйткені спорттың осындай экстремалды түрінде бәсекелестер болмайды.