ЕСІМДЕР
64 жыл бұрын (1962) Е.Бөкетов атындағы Қарағанды университетінің ректоры, басқарма төрағасы Нұрлан Орынбасарұлы ДУЛАТБЕКОВ дүниеге келді.
Қарағанды облысында туған. 1984 жылы Е.Бөкетов атындағы ҚарМУ-ды аяқтап, 1992 жылы ҚР ҒА философия және құқық институтының аспирантурасын тәмамдады.
Еңбек жолы: 1984-1996 жылдары Е.Бөкетов атындағы ҚарМУ-де қылмыстық құқық және криминология кафедрасында оқытушы, аға оқытушы, доцент және кафедра меңгерушісі болды. 1996-2013 жылдары Қарағанды «Болашақ» университетінің ректоры, «Карлаг – болашақ үшін есте сақтау» ғылыми-зерттеу орталығының жетекшісі. 2013-2016 жылдары Қарағанды облыстық мәслихатының хатшысы қызметін атқарған. 2016-2020 жылдары ҚР Парламенті Мәжілісінің (VI шақырылым) депутаты, Заңнама және сот-құқықтық реформа комитетінің мүшесі болды.
Қазіргі қызметінде 2020 жылдың тамыз айынан бері.
Заң ғылымының докторы, профессор, ҚР ҰҒА корреспондент-мүшесі. 150-ден астам ғылыми жұмыстың авторы.
«Достық» (II дәрежелі) орденінің иегері.
64 жыл бұрын (1962) әнші, сазгер, заманауи хит-әндердің авторы, Британдық композиторлар мен ән авторлары академиясының (B.A.C.S.) «Best European Entry» арнайы марапатының, «Тарлан» сыйлығының иегері Еркеш ШӘКЕЕВ дүниеге келді.
Бұрынғы Көкшетау облысы Рузаевка ауылында туған.
Музыкамен кәсіби деңгейде 1987 жылы республикалық «Жастар дауысы» жас дарындар байқауындағы жеңісінен (1-орын және көрермендер көзайымы жүлдесі) кейін айналыса бастады. Осы жеңістен кейін ол Тасқын Оқапов жетекшілік еткен «Арай» ансамбліне орындаушы-автор ретінде жұмысқа шақырылды.
Кейін ол тек жеке әншілікпен ғана айналысып қоймай, қазақстандық және ресейлік жұлдыздарға арнап көптеген әндер жазды.
53 жыл бұрын (1973) Қазақстан Республикасының Норвегия корольдігіндегі төтенше және өкілетті елшісі Әділ Қапанұлы ТҰРСЫНОВ дүниеге келді.
Алматы қаласында туған. 1994 жылы Қазақ мемлекеттік басқару академиясын, 2001 жылы ҚР СІМ Дипломатиялық академиясын бітірген.
Еңбек жолы: 1994-1996 жылдары ҚР СІМ халықаралық ұйымдар және халықаралық экономикалық қатынастар басқармасының референті, атташесі, 1996-1999 жылдары Қазақстан Республикасының Үндістандағы елшілігінде атташе, үшінші хатшы, Қазақстан Республикасының Әзербайжан Республикасындағы елшілігінде екінші хатшы, 1999-2001 жылдары ҚР СІМ Дипломатиялық академиясының тыңдаушысы болды. 2001-2004 жылдары ҚР СІМ-де түрлі басшылық лауазымдар атқарды. 2004-2008 жылдары Қазақстан Республикасының Сингапур Республикасындағы уақытша сенімді өкілі (кеңесші-уәкіл), 2008-2009 жылдары ҚР Президентінің Әкімшілігі Сыртқы саясат орталығы меңгерушісінің орынбасары, 2009-2012 жылдары ҚР СІМ Еуропа департаментінің директоры, 2012-2014 жылдары Қазақстан Республикасының Грузиядағы уақытша сенімді өкілі, Қазақстан Республикасының Грузиядағы елшілігінің кеңесші-уәкілі қызметінде болды. 2015-2016 жылдары ҚР СІМ ТМД департаментінің директоры, 2016-2019 жылдары ҚР Президенті Әкімшілігінің Сыртқы саясат орталығының меңгерушісі, 2019-2022 жылдары ҚР Тұңғыш Президенті кеңесшісі, Ақпараттық-талдамалық қамтамасыз ету бөлімінің меңгерушісі, 2022-2023 жылдары ҚР Сыртқы істер министрінің орынбасары қызметін атқарған.
Қазіргі қызметін 2023 жылдың қаңтар айынан бастап атқарып келеді.
43 жыл бұрын (1983) Маңғыстау облысының жұмыспен қамтуды үйлестіру және әлеуметтік бағдарламалар басқармасының басшысы Нұрбол Абылайұлы ТЕЛЕГЕНОВ дүниеге келді.
Л.Н.Гумилев атындағы Еуразия университетін құқықтану мамандығы бойынша бітірген.
Еңбек жолын 2004 жылы «Отан» партиясы Сарыарқа аудандық филиалының есеп және статистика секторының меңгерушісі, «Жас отан» жастар қозғалысының басшысы, Астана қаласы «Отан» партиясы орталық аппаратының хатшы-референті болып бастады. 2005 жылы «Студенттік құрылыс жастарының еңбек жасақтарының республикалық штабы» мекемесінің атқарушы директоры болып тағайындалды. 2006-2007 жылдары Білім және ғылым министрлігі жастар саясаты департаментінің әлеуметтік бағдарламалар бөлімінің жетекші маманы, 2007-2008 жылдары балалардың құқықтарын қорғау комитеті әкімшілік-кадрлық және құқықтық жұмыс басқармасының бас сарапшысы, Білім және ғылым министрлігі заң департаменті құқықтық қамтамасыз ету басқармасының бас сарапшысы, 2008-2009 жылдары Маңғыстау облысының ішкі саясат басқармасы бастығының орынбасары, 2009-2010 жылдары «Қазақстан темір жолы» АҚ персоналды басқару департаментінің менеджері (Ақтау қаласы), 2010-2013 жылдары Маңғыстау облысы ішкі саясат басқармасы басшысының орынбасары, басшысы, 2013-2014 жылдары ҚР Президентінің жанындағы орталық коммуникациялар қызметінің фронт-офис қызметінің басшысы, 2014-2019 жылдары ҚР Іс басқармасының бас консультанты, сектор меңгерушісі, 2019-2024 жылдары Маңғыстау облысы әкімі аппараты басшысы орынбасарының м.а., 2024 жылы Маңғыстау облысы мемлекеттік еңбек инспекциясы басқармасының басшысы қызметін атқарған.
Қазіргі лауазымын 2024 жылдың қыркүйегінен бері атқарып келеді.
130 жыл бұрын (1896-1979) актер, ұлттық кәсіби театр өнерінің негізін қалаушылардың бірі, Қазақстанның Халық әртісі, КСРО және Қазақ КСР Мемлекеттік сыйлығының лауреаты, Социалистік Еңбек Ері Серәлі (Серке) ҚОЖАМҚҰЛОВ дүниеге келді.
Қостанай облысының Қарабалық ауданында туған. Троицкідегі Уазифа мектебінде, Орынбор қаласындағы Татар халық ағарту институтында оқыған.
Осы жылдары «Мұсылмандар клубында» Б.Майлиннің «Қаламқас», «Бетім-ау, құдағи ғой», «Қасқырбай», «Неке қияр» т.б. шағын пьесаларда рөлдерді ойнаған. 1925 жылы Қызылорда қаласында тұңғыш ұйымдастырылған Қазақ драма театрына И.Байзақов, Ә.Қашаубаев, Е.Өмірзақов, Қ.Қуанышбаев, Ж.Шаниндермен бірге Қожамқұловтың шақырылуы оның актерлік өміріне даңғыл жол салған елеулі оқиға болды.
Осы тұста сахна өмірінен тәжірибесі мол Қожамқұлов театрдың алғашқы режиссері ретінде қызмет етті. Театр 1926 жылы қаңтардың 13-де ресми түрде ашылып, бірнеше спектакльді сахнаға шығарды.
Ол 30-шы жылдардан бастап «Райхан», «Амангелді», «Ана туралы аңыз», «Тыныштық», «Біздің сүйікті дәрігер», «Алдар көсе», т.б. фильмдерге түсіп, Қазақстанның кино өнерінің дамуына өз үлесін қосты.
Қожамқұлов туралы режиссер Қ.Әбусейітов «Сераға» атты деректі фильм түсірсе, композитор Ә.Бейсеуов «Сераға туралы әнін» шығарған. Жезқазған қаласындағы музыкалық драма театры мен Алматыдағы бір көшеге есімі берілген.
Үш мәрте Ленин орденімен, Қазан революциясы, 2-ші дәрежелі Отан соғысы, Еңбек Қызыл Ту, «Құрмет белгісі» ордендерімен, медальдармен