5 тамыз күні тұман түсіп, найзағай ойнап, шаңды дауыл көтеріледі

АСТАНА. KAZINFORM — «Қазгидромет» РМК мәліметінше 5 тамыз күні Қазақстанның 16 өңірінде, сондай-ақ Астана мен Шымкент қалаларында дауылды ескерту жарияланды. 

Астана қаласында түнде және таңертең тұман түседі.

Абай облысының солтүстігінде түнде және таңертең тұман болады. Облыстың оңтүстігінде және орталығында төтенше өрт қаупі сақталады.

Ақтөбе облысының солтүстігі мен батысында күндіз найзағай болжанады. Жел оңтүстіктен батысқа ауысып, күндіз облыстың солтүстігі мен шығысында екпіні 15-18 м/с дейін жетеді. Облыстың батысында жоғары өрт қаупі сақталса, оңтүстігінде төтенше өрт қаупі күтіледі.

Ақмола облысының батысында, солтүстігінде және оңтүстігінде түнде және таңертең тұман болады. Жел оңтүстік-батыстан, батыстан соғады, күндіз облыстың батысы мен оңтүстігінде екпіні 15-20 м/с.

Атырау облысының солтүстігі мен батысында күндіз найзағай болжанады. Жел күндіз солтүстік пен батыста оңтүстік-шығыстан соғып, екпіні 15-20 м/с дейін жетеді. Күндіз аптап ыстық — 35-36°C. Облыстың солтүстігінде, шығысында және оңтүстігінде төтенше өрт қаупі сақталады, ал батысында жоғары өрт қаупі күтіледі.

Шығыс Қазақстан облысының солтүстігі мен шығысында найзағай болады. Түнде және таңертең тұман болады. Жел солтүстік-батыстан соғады, күндіз облыстың шығысында екпіні 15-20 м/с.

Жамбыл облысында түнде таулы аудандарда, күндіз оңтүстікте және таулы аймақтарда найзағай болжанады. Жел солтүстік-шығыстан соғады, облыстың оңтүстік-батысы, солтүстік-шығысы және таулы аудандарында екпіні 15-20 м/с. Облыстың солтүстігі, батысы және шығысында төтенше өрт қаупі сақталады.

Жетісу облысының таулы аймақтарында және күндіз шығысында найзағай болады. Жел солтүстік-шығыстан соғып, шығысында, орталығында және таулы аудандарда екпіні 15-20 м/с, кейде күндіз 23-28 м/с дейін жетуі мүмкін. Облыстың оңтүстігінде төтенше өрт қаупі сақталады.

Батыс Қазақстан облысының батысы мен солтүстігінде найзағай және бұршақ күтіледі. Күндіз аптап ыстық — 35-38°C. Жел оңтүстік-шығыстан, оңтүстіктен соғады, облыстың батысы мен солтүстігінде екпіні 15-20 м/с. Батыста, оңтүстікте және орталықта — жоғары, ал оңтүстік-шығыста — төтенше өрт қаупі сақталады.

Қарағанды облысында жел солтүстік-шығыстан соғады, кейін солтүстік-батысқа ауысады. Түнде және таңертең облыстың оңтүстігінде екпіні 15-20 м/с. Оңтүстікте төтенше өрт қаупі сақталады.

Қызылорда облысында күндіз орталықта, солтүстікте және оңтүстікте шаңды дауыл күтіледі. Жел солтүстік-шығыстан соғып, таңертең және күндіз облыстың орталығы, солтүстігі және оңтүстігінде екпіні 15-20 м/с. Облыстың оңтүстік бөлігінде төтенше өрт қаупі сақталады.

Қостанай облысының батысында таңертең және күндіз найзағай болжанады. Жел оңтүстік-шығыстан соғып, кейін оңтүстік-батысқа ауысады, күндіз облыстың батысында екпіні 15-20 м/с. Оңтүстігінде төтенше өрт қаупі сақталады.

Маңғыстау облысының оңтүстігі мен батысында түнде жел оңтүстік-шығыстан соғады, екпіні 15-18 м/с. Күндіз аптап ыстық — 38°C. Солтүстік-шығысында жоғары, ал батысы, оңтүстігі мен орталығында төтенше өрт қаупі сақталады.

Павлодар облысының батысы мен оңтүстігінде түнде және таңертең тұман болады. Жел солтүстік-батыстан соғады, күндіз облыстың солтүстігі мен шығысында екпіні 15-20 м/с. Солтүстігінде жоғары өрт қаупі сақталады.

Солтүстік Қазақстан облысының батысы мен оңтүстігінде түнде және таңертең тұман болады.

Түркістан облысының солтүстігінде күндіз шаңды дауыл болжанады. Жел солтүстік-шығыстан соғып, облыстың солтүстігі, батысы және таулы аудандарында екпіні 15-20 м/с дейін жетеді. Бүкіл облыс аумағында төтенше өрт қаупі сақталады.

Ұлытау облысының оңтүстігінде төтенше өрт қаупі сақталады.

Шымкент қаласында күндіз солтүстік-шығыстан жел соғып, екпіні 15-20 м/с. Қалада төтенше өрт қаупі сақталады.