600 мыңнан аса қазақстандық демалысын Өзбекстанда өткізді

ТАШКЕНТ. KAZINFORM — Биыл қаңтар-сәуір айлары аралығында Өзбекстанға 3,1 миллионнан астам шетелдік турист келді, бұл өткен жылдың сәйкес кезіңімен салыстырғанда 46,4%-ға көп, деп хабарлайды Kazinform агенттігінің меншікті тілшісі.

Өзбекстанның Ұлттық статистика комитетінің өкілдері мәлім еткендей, елге саяхаттап келген шетелдіктердің көбі — Қырғызстан (942,2 мың адам) мен Тәжікстан (793,9 мың адам) азаматтары.

Бұл ретте үштікті Қазақстан түйіндейді. Биыл қаңтар-сәуір аралығында 617 мыңнан аса қазақстандық демалысын Өзбекстанда өткізген.

Туристердің көбі Ташкент, Самарқанд, Бұхара және Хиуа қалаларының көрікті жерлеріне саяхаттаған.

Еске салайық, 2024 жылы Өзбекстан 2,2 млн қазақстандық саяхатшыны қабылдауды жоспарлаған еді. Дегенмен былтыр 11 айда елге 1,3 миллионнан астам қазақстандық турист келген.