ОРАЛ. ҚазАқпарат - Оралда 8 адам қаза тапқан жол-көлік оқиғасына қатысты жаңа деректер анықталды, деп хабарлайды ҚазАқпарат тілшісі.
БҚО Полиция департаменті баспасөз қызметінен түскен мәліметке қарағанда, сот-медициналық сараптамаға сәйкес «Nissan Maxima» автокөлігінің 32 жастағы жүргізушісі мас болған. Ол басып озу кезінде қарсы бетке шығып кетіп, 40 жастағы жүргізуші айдап келе жатқан «Лада 11183» автокөлігімен соқтығысқан.
Салдарынан 8 адам қаза болды.
Сот-медициналық сараптама «Лада 11183» автокөлігінің жүргізушісі ішімдік ішпегенін көрсеткен.
БҚО Төтенше жағдайлар департаментінің мәліметі бойынша «Лада 11183» көлігінің рулінде болған Серік Макаров Апаттар медицинасы орталығы мемлекеттік мекемесінің жүргізуші-санитары болып жұмыс жасаған. Ол өзінің жеке көлігімен тойдан қайтып келе жатқан. С.Макаровпен бірге әйелі, екі баласы және жақын туыстары, барлығы 8 адам көз жұмды.
Еске салайық, бұдан бұрын Оралда жол апатынан 8 адам қаза тапқанын, оқиғаға қатысты қылмыстық іс қозғалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).